BAUCAU, 25 abríl 2023 (TATOLI) – Uma komunidade hamutuk hitu hetan estragu iha suku Uailili, postu administrativu Baucau Vila, bainhira akontese tuda malu hafoin kampaña komísiu Partidu Kongresu Nasionál Rekonstrusaun Timorense (CNRT, sigla portugés) iha munisípiu Baucau.
Kronolojia akontesimentu mosu bainhira militante paridu CNRT fila hosi fatin kampaña tuir dalan diresaun Baucau ba postu Venilale hetan tuda hosi grupu deskoñesidu iha suku Ualili, postu admistrativu Baucau vila iha loron dumingu, 23 abríl purvolta oras 19:00 kalan.
“Tuda malu lakleur purvolta minutu 10 de’it tanba ita halo seguransa rigór tantu Task Torce no membru hosi eskuadra Venilale halo akompañamentu maibé to’o iha Igreja Uailili ema deskoñesidu tuda hosi foho leten nakukun,” Komandante PNTL munisípiu Baucau, Superintendente Xefe, António de Sá hateten iha Vila Nova, tersa ne’e.
Militante hosi parte CNRT responde kedas ho tuda tanba antes ne’e prepara ona fatuk iha karreta laran nune’e hosi tuda malu entre grupu rua refere rezulta uma komunidade hamutuk hitu hetan estragu iha kalen, odamatan no janela.
Kazu refere mos rezulta ekipamentu kursu komputadór hosi Organizasaun Naun Govermentál iha sentru Uailili hetan estragu no membru PNTL eskuadra Venilale na’in-ida hetan kanek kiik iha ulun bainhira halo atauasaun ba kazu refere.
Komandu PNTL Baucau liuhosi koordenasaun ho autoridade suku no Ofisiál Polísia Suku (OPS) identifika kazu refere ligadu ho arte-marsiál no rejista ona autór na’in-rua ne’ebé hamosu akontesementu tuda-malu refere.
“Ita identifika ona motivu hosi akontesementu ne’e tanba kazu odiu malu antigu nune’e aproveita kampaña hodi tuda malu,” Superintendente Xefe António de Sá akresenta.
Iha loron hanesan, PNTL Baucau seksaun tránzitu asegura motorizada hamutuk sia ne’ebé utiliza kanu-resin durante kampaña iha loron domingu, 23 abríl no konsege fó sansaun koima ba motorizada hirak-ne’e.
Komandu PNTL apela ba komunidade liuliu joven Baucau atu kontinua mantein kalma no kolabora ho parte seguransa hametin pás inklui estabilidade durante períodu kampaña polítiku to’o eleisaun tinan-ne’e remata ho susesu.
Jornalista : Natalino Belo
Editór : Evaristo Soares Martins
