DILI, 26 abríl 2023 (TATOLI)—Diretór empreza Cipriano Felix Unipessoal, Lda, Arsénio da Costa Pinto Cabral, konsidera Governu presiza kria merkadu ba produtu lokál sira nune’e produtór sira bele hasa’e produtividade.
“Hanesan empreza lokál ba Coconut oil reprezenta ha’u-nia maluk sira, husu ba Governu atu fasilita ami kria merkadu ho maneira saida de’it nune’e ami bele fa’an produtu ne’ebé prodús,” Emprezáriu nasionál ne’e hateten liuhosi entrevista eskluziva iha estúdiu Agência Tatoli, iha Farol, semana ne’e.
Nia dehan, Govrernu presiza kria merkadu la’ós de’it ba empreza lokál sira maibé mós ba agrikultór sira hotu tanba agrikultór sira badinas kuda hahán tradisionál maibé dala-ruma produsaun laiha valór.
“Ita hotu hatene, bainhira merkadu iha ona tantu empreza lokál no agriklutór sira sei badinas hasa’e produsaun ba produtu hotu no ida-ne’e sei ajuda ita labele depedénsia ba produtu importasaun sira,” nia akresenta.
Notísia relevante : CLN prepara millaun $8 sosa produtu lokál variedade hitu
Nune’e, nia husu ba Governu agora ka foun mai tenke tau importánsia ba produtu rai-laran tanba bainhira ema prodús maibé merkadu laiha mak empreza sira sei hasoru difikuldade no Timor-Leste mós kontinua depedénsia ba produtu importasaun sira.
Nia dehan, Governu nia programa kona-ba krédiku suave ne’ebé ho funan kiik ka juru 3% ne’e di’ak tanba fasilita empreza lokál sira halo kréditu maibé merkadu laiha, nune’e fó impaktu tanba produtu sira ne’ebé empreza sira prodús ema la sosa no labele selu fali kréditu ne’e rasik.
Arsénio da Costa hateten Loloos Governu antes implementa polítika ka introdús programa kréditu suave ho funan kiik 3% ne’e kria uluk merkadu nune’e ema husu kréditu hodi hala’o atividade ruma no garante hodi selu fali osan empréstimu.
“Ami-nia difikuldade mak osan no merkadu maibé tanba Governu agora implementa programa kréditu ho funan kiik, entaun ba oin Governu tenke hanoin kria merkadu nune’e ita foti osan halo negósiu tau fali nia fatin fó fali oportunidade ba ema selu foti,” nia tenik.
Jornalista : Arminda Fonseca
Editora : Julia Chatarina
