LOSPALOS, 26 abril 2023 ( TATOLI)– Superintendente Komandante Polísia Nasionál Timor-Leste( PNTL) Munisípiu Lautém, António Rego Fernandes informa, PNTL Munisípiu Lautém preparadú fó seguransa ba elisaun parlamentár ne’ebé sei realiza iha loron 21 fulan maiu tinan ne’e.
“PNTL Lautém hamutuk membru 143, sira ne’e preparadu atu fó seguransa másimu ba eleisaun parlamentár 2023 ne’ebé sei hala’o iha 21 maiu,” Komandante Polísia, António do Rego Fernandes, hateten ba TATOLI, iha kuartel PNTL Lospalos Vila , Munisípiu Lautém, iha kuarta ne’e.
Komandante ne’e informa desde hahú kampaña eleitorál iha loron 19 abril, PNTL mós servisu hamutuk ho Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE) Munisípiu Lautém hodi konstribui ba aktividade kampaña polítiku no la deteta infrasaun no kriminalidade ruma durante kampaña polítiku iha Munisípiu Lautém.
“Kolaborasaun entre STAE no CNE la’o di’ak tebes, nune’e PNTL asegura kampaña polítiku ba partidu 17 ne,ebé mai halo Kompromisu polítiku iha Munisípiu Lautém no até agora laiha asidente no insidente ruma durante kampaña. Espera katak lideransa partidu, militante, simpatizante sira husi partidu polítiku hotu bele kolabora ho PNTL no institusaun relevante hodi promove páz no estabilidade atu fó susesu ba eleisaun parlamentár ne’ebé sei mai,” nia subliña.
Jornalista: Camilio de Sousa
Editor : Nelia Borges
