LIQUIÇA, 30 abril 2023 (TATOLI)— Prezidente Ko-Troika, Tito Cristovão ‘Lere Anan Timur’, promete bainhira povu fó fiar ba Frente Revolusionária Timor-Leste Independente (FRETILIN) iha Eleisaun Parlamentár (ElPar) mak, sei hatuur lei loloos hodi kontrola arte-marsiál iha Timor-Leste.
Lere promesa liafuan ne’e, durante hala’o intervensaun polítika iha atividade kampaña eleitorál ho tipu komísiu ne’ebé realiza iha kampu futebol Liquiça Villa, munisípiu Liquiça, domingu ne’e.
“Kestaun seluk konaba arte-marsiál, balun to’o politiza tan arte-marsial uluk balun dehan taka arte marsiais, Ha’u dehan la taka mas halo regra no lei hatu’ur sira sai loloos, se’e mak ukun la halo lei ba arte-marsiál, imi (joven) mak sai vitima ba ukun nain sira nia hahalok,” Lere hateten.
Nia esplika, joven se’e deit mak tuir arte-marsiál no rituais. Sira hotu mesak Timor-oan deit ne’ebé dadauk ne’e ema barak foti nia kontribuisaun hodi politiza. Nune’e bainhira iha lei ne’ebé loos, prezensa grupu hirak ne’e sei hamutuk hodi lori Timor-Leste nia naran morin iha liur.
“Se kuandu la halo lei sem duvida loron kalan mak baku malu, mas governu ne’ebé mak hatene ukun sei fo moris ba povu nian. FRETILIN ukun sei hadia arte marsiál atu diak liu tan iha Timor-Leste,” nia afirma.
Lere rekoñese problema joven nian balun mak dezempregu no iha Partidu balun promete sei lori joven rihun ba rihun ba liur, maibé polítika FRETILIN nian mak apoiu joven sira buka servisu iha rai liur no governu hamriik hodi fo dignidade ba nia povu no sei fila mai nia rai hodi desenvolve rai Timor.
“Karik ema rihun 500 ba liur ne’e imi fila mai xiñes mak nakonu, Joven ba liur ne’e diak, laos ladiak maibé se ema ukun tenke fo dignidade ba nia oan sira. See ba tinan 5 tenke fila laos husik deit diak ka aat, mate ka moris problema o nian, nee ita nia ema. Esforsu ba tanba mate mak destinu, kiak laos destinu, hakaas aan hamoris familia iha TL,” Lere hateten.
Prezidente Ko-Troika nafatin husu ba joven sira hodi respeita líder istoriku sira liu-liu ba Marí Alkatiri, Xanana Gusmão, José Ramos Horta no seluk tan hodi hamutuk desenvolve Timor-Leste tanba partidu ida mesak sei labele halo milagre hodi atinje mehi oin-oin.
Kampaña Eleitoral husi FRETILIN ne’e rasik hetan seguransa husi PNTL inklui inklui mos hetan observasaun hanesan CNE, RENETIL no seluk tan.
Jornalista : Cidalia Fátima
Editora : Armandina Moniz
