BAUCAU, 02 abríl 2023 (TATOLI) – Partidu Os Verdes de Timor (PVT) promete estabelese sentru turismu iha munisípiu Baucau bainhira envolve iha governasaun foun, nune’e husu vota ba partidu refere iha eleisaun parlamentár.
Prezidente Os Verdes de Timor, António Lela Huno Cruz, esplika, munisípiu Baucau iha poténsia nu’udar fatin turismu hanesan tasi nia furak, relijioza, natureza inklui istóriku.
“Imi serbisu maka’as atu verde manán bele halo koligasaun ba kaer governu, ita halo Baucau sai sidade buras, matak no malirin, sidade ne’ebé tenke konsentra ba turismu,” Prezidente Os Verdes de Timor hateten iha kampu futeból Triloka, tersa ne’e.
Bainhira fó fiar Os verdes sei dezeña planu sentru integradu turismu hanesan sentru konsentrasaun iha ponte leste ba vizitante sira nune’e sei vizita ba fatin pontesiál sira iha munisípiu Baucau.
Lela Hunu husu Baucau oan atu kontribui ba pás no estabilidade atu futuru bele sai sentru turismu ne’ebé iha ambiente dame liuliu iha área ponta leste.
“Imi labele muturabu ona, tenke haree malu hanesan maun no alin, partidu ketak-ketak ne’e normál,” Lela Hunu akresenta.
Programa inportante seluk hosi Os Verdes de Timor liuhosi orsamentu subvensaun públiku mak hanesan harii sentru formasaun empregu verdes, sei haruka juventude dezempregu hamutuk rihun 50, harii empreza verdes hamutuk rihun ida.
Nune’e mós oferese bolsa estudu ba membru verdes hamutuk rihun ida, harii indústria hahaan hosi pekuária no instala embaixadór verdes iha nasaun 10.
Munisípiu Baucau ih fatin turismu sira hanesan foho matebian nia aas metro 2.316, turismu istóriku hanesan fatin abrigu ba FALINTIL, iha sítiu Goa 7 rezultadu konstrusaun hosi forsa Japaun iha tempo 2⁰ gerra mundiál, iha bee-manas, lagoa iha área Venilale, iha mós natar ne’ebé luan hosi parte Vemasse, Venilale, Baucau-Vila, Laga inklui Quelicai no Baguia rohan.
Baucau iha étniku ho lian materna hanesan Makasae, Uaimaa, Galolen, Midiki no Nau-eti, iha pontensialidade ba área turismu tantu tasi Uatabo, Laga, Kairabela, Uaiwono, Seiçal, Buru-uma ne’ebé mak nia ekonomikamente alende agrikultura inklui peska.
Jornalista : Natalino Belo
Editór : Evaristo Soares Martins
