DILI, 04 maiu 2023 (TATOLI)–Xefe Departamentu Investigasaun Kiminál Nasionál Polísia Nasionál Timor-Leste (PNTL), Superintendente Xefe Jorge Monteiro, hateten Polísia investigasaun seidauk identifika identidade loloos suspeitu sira ne’ebé tá timor-oan na’in-ida iha área fronteira terrestre, suku Cová, postu administrativu Balibo, munisípiu Bobonaro.
“Suspeitu 20 resin ne’ebé komete kazu tentativa omesidu ne’e ita seidauk bele identifika sidadaun sira ne’e ema ne’ebé nian, timor-oan ka Indonéziu, maibé akontesementu ne’e iha área jurídiku territóriu Timor-Leste,” Superintendente Xefe Jorge Monteiro, informa liuhosi konferénsia imprensa, iha Kuartel Jerál PNTL, Caicoli, kinta ne’e.
Notísia relevante : Timoroan ida hetan tá iha área fronteira Bobonaro
Nia relata, kronolojia kazu tentativa omesidu iha munisípiu Bobonaro akontese iha loron 29 abríl 2023, sidadaun timor-oan na’in-tolu ilegalmente tama iha Atambua-Indonésia bá sosa motorizada, no iha loron 30 abríl sira ho motorizada rua ne’ebé sira sosa hala’o viajen filafali hosi Atambua mai Timor, iha dalan sira hetan asaltu hosi grupu deskoñesidu hamutuk ema na’in-20 resin, ne’ebé hosi asaltu ne’e konsege rezulta vítima ida kanek iha ulun, kotuk no parte liman, no hosi asaltu ne’e sidadaun na’in-tolu ne’e halai soe hela motorizada no sira halai ketak-ketak.
Nune’e, iha loron 30 abríl PNTL munisípiu Bobonaro halo ona prosesu investigasaun inísiu no vítima ne’ebé kanek daudaun halo hela tratamentu saúde iha klínika Atabae, enkuantu Polísia mós foti ona informasaun kompletu vítima na’in-rua seluk ne’ebé la hetan kanek.
“Finalidade deside katak relasiona ho kazu refere, prosesu no prosedimentu investigasaun sei asegura iha investigasaun nível nasionál la’ós ona nível munisipál. Suspeitu ba kazu ne’e daudaun iha hela prosesu investigasaun no motorizada rua daudaun iha Polísia,” nia informa.
Bainhira servisu investigasaun kriminál finaliza ona prosesu investigasaun mak sei relata ba Ministériu Públiku.
Jornalista : Antónia Gusmão
Editora : Julia Chatarina
