TL selebra loron mundiál fase liman hodi fó hanoin ba pesoál saúde
DILI, 05 maiu 2023 (TATOLI) – Hospitál Nasionál Guido Valadares (HNGV), sesta ne’e selebra loron mundiál fase liman ho objetivu atu fó hanoin ba pesoál saúde sira atu hamoos liman molok fó atendimentu ba pasiente sira
“Selebra loron fase liman ne’e, ita fó hanoin ba ita-nia pesoál saúde sira hotu katak parte prinsipál husi prevensaun infesaun mak ijiéne liman, liuhosi ida ne’e bele hakotu ka hamate transmisaun batéria iha ambiente ospitál, iha sosiedade no fatin hotuhotu”, Xefe Gabinete Kualidade no Komunikasaun Sosiál iha HNGV, Sara Maria Xavier, afirma iha edifísiu HNGV-Bidau.
Tuir nia, saúde ijiéne liman ne’e importamte tebes tanba atu hamate batéria ne’ebé moris iha ambiente HNGV ne’ebé fó perigu tebtebes ba ema nia saúde.
“Tanba ita uja antibiótika, bainhira mikrobiu ne’ebé moris iha ambiente, hafoin tama ba pasiente nia ran signifika, ita pesoál saúde mak lori hodi transmite ba pasiente sira liuhosi ita-nia liman ne’ebé mak la fase tuir momentu sira”, nia katak.
Nia rekoñese pesoál saúde sira komesa hatoman aan hodi fase liman molok fó tratamentu ba pasiente sira maibé presiza fó hanoin bebeik ba pesoál saúde sira iha fasilidade saúde sira iha territóriu laran tomak.
“Ita kria fasilidade fase liman nian hanesan prepera torneira bee iha fasilidade saúde sira ho sabaun atu pesoál saúde no sidadaun hatoman fase liman ho sabaun”, nia afirma.
Ho fase liman, sei hakotu korente infesaun tanba dala barak akontese husi liman bele transmite moras ba an no ema seluk.
Tuir padraun ne’ebé fó husi OMS katak fase liman loloos iha etapa purvolta 10 hodi nune’e bele livre husi virus ka kutun ruma hodi evita da’et ba ema seluk.
Etapa fase liman ida loos maka, habokon liman ho bee no tau sabaun natoon, kose liman laran no kotuk, kose liman fuan no sanak sira, kose liman laran ho liman fuan sira metin, kose liman fuan sira ba liman kotuk, liman karuk no hanesan ba liman parte loos nian, kose haleu liman fuan boot liman karuk nian, halo hanesan ba liman loos, kose liman fuan sira husi liman loos nian ba liman fuan laran liman karuk nian, halo hanesan ba liman loos, fase liman ho bee, hamaran liman didiak ho tisu no hamate torneira ho tisu.
Jornalista : Felicidade Ximenes
Editór : Zezito Silva
