Boxista Delio prepara ba semi finál hafoin fó KO ba Boxista Singapura iha SEA Games
MANUFAHI, 07 maiu 2023 (TATOLI) – Boxista Timoroan Delio Mouzinho manán bainhira “Hurlele” nia adversáriu Muhammad Khidir Bin Sanif hosi Singapura. Hosi vitória ne’e, boxista timoroan prepara aan atu hakur ba semi finál iha eventu internasionál SEA Games 2023.
“Ho manán ida ne’e, nia hakat ona ba semi-final iha 12 maiu agora hodi kontra Boxista Vietname, nia preparadu no prontu atu joga iha semi-finál”, Treinadór Abilio Orlando dos Santos, dehan ba Agência TATOLI via media sosiál WhatsApp, domingu ne’e.
Vitória hosi Delio, gaña halo morin Timor-Leste, bainhira dere Boxista Singapura ne’ebé hetan knock out (KO), liuhosi menutu ida de’it nia-laran.
“Sim, ita-nia atleta Delio halo jogu kapas no ita konsege manán Boxista Singapura nian no hein fali hakat ba semi-finál”, nia akresenta.
Nia dehan, vitória hosi Delio hanesan orgullu ba Timor-Leste tanba bele manan Boxista Singapura ne’ebé iha eventu internasionál.
Iha biban ne’e, Atleta Delio, sente kontente no orgullu tanba bele manán atleta hosi Singapura no prepara aan nafatin atu kontra Vietname iha semi-finál.
“Ha’u prontu atu joga iha semi-finál no fiar aan manán, ha’u husu ba povu Timor-Leste hotu atu suporta nafatin ha’u ho imi nia orasaun”, Delio dehan liu hosi WhatsApp.
Tuir oráriu ne’ebé iha, orasida atleta na’in rua hanesan Elidio da Conseição sei joga hasoru atleta hosi Thailandia no Alexandre Emiliano sei kontra atleta hosi Myanmar.
Biodata badak
Delio A. Mouzinho “Nuhachay” moris iha loron 4 fulan fevereiru tinan 2000, iha Aldeia Tchai Suku Lore Postu Administrativu Lore, Munisipiu Lautem. Oan husi Manuel Mouzinho no Elisa Mouzinho, Oan daneen (6) husi maun alin nain hitu (7).
Boxista Nuhachay hahú tama Ensinu Bazica Filial Tchai iha tinan 2009 too 2014, kontinua tama Ensinu Bazica Central Coro-Asu de Maloru iha tinan 2015 to’o 2017, iha tinan 2018 to’o 2020 Nuhachay tama ba Ensinu Sekundariu Geral Lere Anan Timor iha Lospalos Villa Iha tinan 2021 kontinua nia estudu superior iha Dili Institute of Technology (DIT), foti área Petroleum Engineering, maibé sei iha trimester II Nuhachay deside hapara nia estudu tanba hakarak tebes promove no dezenvolve nia kareira iha boxing.
Iha tinan 2018, Delio A. Mouzinho “Nuhachay” hahú tama iha vida boxing iha Lospalos, Lereloho no fó treinu husi Coach Elizario Dias Monteiro Irapere. Nuhachay tuir kompetisaun dahuluk iha tinan 2019 nunka lakon iha Timor-Leste.
Iha tinan 2020 Boxista ne e tama ba El-Marador Boxing Club no kontinua treinu to’o selesionadu husi Federasaun Boxing Timor Leste ba tuir Sea Games 2021 iha nasaun Vietname.
Bainhira iha SEA Games Vietname Delio konsege sai hanesan segundu lugar hodi oferese medalla osan mutin ida ba Timor-Leste no marka istória dala uluk bainhira tuku monu Boxista hosi Kamboja monu iha rin leten no lori kedan ba ospitál Vietname nian.
Jornalista: Hortencio Sanchez
Editór : Zezito Silva
