MANUFAHI, 07 maiu 2023 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hala’o vizita traballu ba nasaun tolu mak hanesan, Reinu Unidu, Indonézia no Suésia.
Ministra Magno, dezloka hosi Dili ba Reinu Unidu iha 01 maiu 2023, hodi partisipa iha serimónia koroasaun sua Majestade Liurai, ne’ebé hala’o iha 06 maiu 2023, iha Westminster, Abbey, London.
“Serimónia koroasaun sei halo ba sua Majestade Liurai Charles III, hamutuk ho Liurai Feto”, tenik iha komunikadu ne’ebé Agência TATOLI asesu, domingu ne’e.
Molok loron serimónia koroasaun nian, Ministra Magno sei partisipa iha reuniaun dader Estadu illa ki’ik sira iha faze dezenvolvimentu (SIDS, Siglá Inglés), ne’ebé hala’o iha 05 maiu 2023, iha Lancaster House, Stable Yard, St. James no partisipa mós iha resepsaun ida iha Palásiu Buckingham.
Hafoin remata nia vizita iha Reinu Unidu, Ministra Magno sei akompaña Primeiru-Ministru Taur Matan Ruak, ba Indonézia hodi partisipa iha Simeira ASEAN ba dála-42.
Simeira ne’e sei hala’o iha 08-11 maiu 2023, iha Labuan Bajo, NTT. Simeira ASEAN ba dála-42 ne’e sai nu’udar reuniaun dahuluk hosi reuniaun rua ne’ebé sei hala’o durante Prezidénsia rotativa Indonézia nian iha tinan 2023.
Simeira ne’e sei partisipa hosi Xefe Estadu no Governu Paíz membru ASEAN nian, inklui mós Timor-Leste nu’udar membru ba dála-11 ho estatutu observadór, bazea ba rezultadu Simeira ASEAN ba dála- 40 no 41 durante Prezidénsia rotativa Kamboja nian.
Hafoin ne’e, Ministra Magno sei kontinua viajén hosi Labuan Bajo, Indonézia ba Suésia hodi partisipa iha Fórum Ministeriál Uniaun Europeia Indo-Pasífiku iha Stockholm, ne’ebé sei hala’o iha 13 maiu 2023.
Ministru Negósiu Estranjeiru Suésia, Tobias Billström no Altu Reprezentante Uniaun Europeia ba Negósiu Estranjeiru no Polítika Seguransa, Josep Borrell ko-prezide Fórum Ministeriál UE Indo-Pasífiku iha Stockholm.
Fórum ne’e ho objetivu atu hametin parseria entre Uniaun Europeia no rejíaun Indo-Pasífiku, bazeia ba Estratejia Kooperasaun Uniaun Europeia iha Indo-Pasífiku, adopta iha 2021, hodi promove kresimentu sustentável no prosperiedade bainhira hasoru dezafiu globál sira.
Jornalista: Hortencio Sanchez
Editór : Zezito Silva
