Abríl : Sentru Saúde Laleia rejista 192 kazu ISPA
DILI, 08 maiu 2023 (TATOLI) – Xefe Sentru Saúde Laleia Jose da Costa, informa iha fulan abríl moras Infensaun Vias Respiratóriu Aguda (ISPA) ne’ebé rejista aas iha Sentru Saúde Laleia hamutuk 192.
“Durante fulan abríl, moras ne’ebé mak ami rejista aas iha Sentru Saúde Laleia mak Infensaun Vias Respiratóriu Aguda (ISPA) hamutuk 192 ne’ebé afeta ba labarik no mós ema boot sira”, Jose da Costa dehan ba TATOLI via telefone, ohin.
Nia hateten, moras ISPA ne’e mai husi rai rahun, entaun inan aman sira la kontrola oan sira impaktu ba sira nia saúde maibé mai halo tratamentu iha ne’e to’o rekopera hotu.
“Moras ISPA ne’e problema ijiéniku individuál ba labarik sira tanba inan aman sira ladún tau antensaun ba sira-nia saúde ijiéniku hanesan rai rahun, ahi suar ne’ebé mak iha maibe mai halo tratamentu to’o rekopera hotu”, nia afirma.
Nia esplika, atu halo prevensaun ba moras mak uza maskara, halo distánsia fízika hodi hasses an husi ahi suar, sigaru no rai rahun.
“Atu halo prevensaun ba moras mak uza maskara, halo distánsia fízika, dook hosi ahi suar, sigaru suar, rai rahun no inan aman sira atu fuma labele kous oan sira”, nia informa.
Iha fulan abríl ida ne’e, Sentru Saúde Laleia rejista mós kazu diarea hamutuk 12, pneumonia neen, skabies lima, tuberkoloze ida no asidente trafegu haat.
Jornalista : Felicidade Ximenes
Editór : Zezito Silva
