DILI, 08 maiu 2023 (TATOLI)–Portavós Komandu Polísia Nasionál Timor-Leste (PNTL), Superentende Xefe Arnaldo Araújo, informa, Polísia Investigasaun Kriminál munisípiu Dili finaliza ona investigasaun ba kazu ne’ebé akontese iha Kintál-boot, área Universidade Dili (UNDIL), iha loron 6 maiu 2023.
“Atu informa katak prosesu identifikasaun ne’e hosi Komandu PNTL munisípiu Dili no finaliza ona, ne’ebé ninia andamentu prosesu ne’e lori ona ba Ministériu Públiku hodi hala’o interrogatóriu dahuluk iha Tribunál,” Portavós Komandu PNTL ne’e hateten liuhosi konferénsia imprensa, iha Kuartel Jerál PNTL, Caicoli, segunda ne’e.
Notísia relevante : TDD adia alegasaun ba krime omisídiu simples
Nia konta tuir, kazu ne’e akontese tanba iha grupu ida hemu tua to’o lanu depois mosu diskusaun, nune’e hosi diskusaun maka suspeitu lori tudik sona vítima no lori kanuru suru rai-henek mak baku mate matebian Dodi Adão de Jesus.
Suspeitu ba kazu ne’e hamutuk na’in-haat ho inisiál E.P.S., L.D.B, A.P.A no J.P.S, daudaun detein hela iha sela Komandu Polísia munisípiu Dili.
“Sira na’in-haat ne’e hela iha Kintál-boot hanesan mós matebian,” Portavós akresenta.
Matebian Dodi Adão de Jesus moris iha loron 03 janeiru 2005 no matebian hakotu iis ho idade 18, daudaun hela iha aldeia 12 novembru, suku Santa Cruz, postu administrativu Na’in Feto, munisípiu Dili.
Aleinde ne’e, daudaun situasaun ein jerál iha territóriu Timor-Leste, inklui kapitál Dili la’o normál no kontroladu.
Jornalista : Antónia Gusmão
Editora : Julia Chatarina
