ERMERA, 08 maiu 2023 (TATOLI) – Sekretariadu Tékniku Administrasaun Eleitórál (STAE) munisípiu Ermera realiza formasaun ba Ofísial Eleitorál hamutuk 190 husi sentru votasaun no estasaun votu iha Postu Administrativu Hatulia B, hodi prepara ba Eleisaun Parlamentár 21 maiu.
“Ohin Poling Staff na’in 190 husi Sentru Votasaun 16 no Estasaun Votu 19 iha Hatulia B mak partisipa iha formasaun ida ne’e,” Diretór STAE Munisípiu Ermera, Eduardo Casimiro de Deus ba Agência Tatoli hafoin formasaun, iha Suku Fatubolu, Postu Administrativu Hatulia B, Munisípiu Ermera, segunda ne’e.
Eduardo hateten, objetivu husi formasaun ne’e atu prepara Ofisiál Eleitorál sira hodi serbisu iha sentru votasaun no estasaun votu sira ho didi’ak.
“Iha formasaun ne’e ita hato’o ba poling staff sira kona-ba sira-nia knaar, liga ho saida mak sira sei halo durante eleisaun 21 maiu. Entaun objetivu prinsipál mak ne’e, liuhusi formasaun ne’e ita hasa’e sira-nia koñesimentu hodi asegura Eleisaun Parlamentár mai ne’e ho krédivel, justu no livre,” Eduardo esplika.
Nia informa katak, iha munisípiu Ermera eziste sentru votasaun hmutuk 140 no estasaun votasaun 158.
“Husi Munisípiu Ermera, ita iha poling staff hamutuk 1580 mak simu ona formsaun. Entaun, formasaun ba Poling Staff iha Ermera ita sei termina iha dia 4 maiu,” Eduardo akresenta.
Nia dehan, STAE munisípiu Ermera másimu preparadu hodi realiza Eleisaun Parlamentár iha Ermera.
Jornalista: Filomeno Martins
Editora: Nelia Borges