DILI, 08 maiu 2023 (TATOLI) – Diretór Nasionál Ambulánsia Emerjénsia no Medikamentu (SNAEM.IP) Horacio Sarmento, dehan situasaun ne’ebé Timor-Leste enfenta mak ambulánsia la sufisiente atu tula pasiente sira iha teritóriu nasionál.
“Ita iha problema oituan tanba agora kareta 26 de’it, hirak ne’ebé koloka iha nasionál hamutuk ualu no sira seluk ne’e iha munisípiu sira tanba haree ba númeru kazu ne’ebé konsentra iha nasionál barak entaun kareta ualu iha nasionál fahe ba estasaun Comoro, Becora no Sentrál maibé ida ne’e la sufisiente nafatin ba ami”, Horacio Sarmento informa iha nia kna’ar fatin SNAEM.IP Caicoli, ohin.
Nia dehan, kareta ambulánsia sira iha munisípiu sira balun rua maibé nafatin problema tanba kazu transferénsia ho númeru ne’ebé makas, entaun kareta sira ne’e la sufisiente atu halo transportasaun mai nasionál.
“Kareta ambulánsia iha munisípiu balun, kareta ida no balun rua, maibé sai problema nafatin ba ami, tanba ho kazu transferénsia ne’e ho númeru ne’ebé makas husi munisípiu hotu-hotu, ida ne’e la sufisiente duni”, nia esplika.
Nia afirma, kareta ambulánsia la sufisiente atu tula pasiente sira tanba kareta barak mak tuan ona presiza foun atu subtitui.
“Ami agora problema tanba ami-nia orsamentu ba tinan 2023 atu hola ambulánsia ne’e la aprova, entaun susar atu ami agora buka hela doasaun husi OMS atu apoiu ambulánsia balun iha tempu badak maibé ida ne’e sei kleur no sei prosesu naruk tanba tenke hetan aprovasaun husi diretór rejionál WHO nian, karik nia aprova ba oin bele tulun ita atu subtitui ba munisípiu sira ne’ebé mak daudaun ne’e iha problema”, nia relata.
Nia akresenta, iha tinan 2023 atu sosa ambulánsia 10 maibé iha diskusaun ho Ministériu Finansas, orsamentu la aprova, entaun ida ne’e sai problema ba SNAEM.IP .
Jornalista : Felicidade Ximenes
Editór : Zezito Silva
