Empreza Buka Fini konklui ona reabilitasaun sentru onkolojia iha HNGV
DILI, 10 maiu 2023 (TATOLI) – Diretór Jerál Servisu Koorporativu iha Ministériu Saúde, Marcelo Amaral, hateten kompaña Buka Fini finaliza ona reabilitasaun sentru onkolojia iha Hospitál Nasionál Guido Valadares (HNGV).
“Reabilitasaun ba sentru onkolojia iha Hospitál Nasionál Guido Vadalares daudaun ne’e hotu ona no kompaña Buka Fini sei entrega iha semana oin. Espera katak depois elisaun hotu, ita bele inagura ba fatin ida ne’e tanba daudaun ita atu priénse mobiliáriu sira no mós ekipamentu médiku sira”, Amaral dehan ba TATOLI iha Banku Mundial Lesidere, ohin.
Nia informa, kona-ba rekursu umanus sufisiente atu halo servisu iha sentru onkoljia tanba Ministériu Saúde mós haruka profisionál saúde na’in 16 ba Jakarta tuir formasuan kona-ba onkoljia nian iha fulan kotuk liubá no sira fila fali mai ona hein atu halo lansamentu atu sira hahú servisu.
“Kona-ba rekursu umanus ita sufisiente, médiku espesialista sira foin mak fila husi formasaun husi Kuba mai no ita mós haruka ona ekipa médiku hamutuk 16 ba kursu iha ospitál Siloam Jakarta, entaun sira preparadu ona liuliu ba enfermeira, parteira, farmasista atu bele halao servisu iha ita-nia sentru onkolojia ida ne’e”, nia esplika.
Rekorda fali katak orsamentu ne’ebé uza hodi reabilita fatin onkoljia iha HNGV husi Ministériu Saúde ho orsamentu Jerál Estadu 2022 ho montante $ 47.706.
Jornalista : Felicidade Ximenes
Editór : Zezito Silva
