DILI, 10 maiu 2023 (TATOLI)–Reuniaun Konsellu Ministru (KM), kuarta ne’e, aprova ona projetu rezolusaun rua ne’ebé aprezenta hosi Ministru Finansa, Rui Augusto Gomes.
Projetu hirak ne’e kona-ba alterasaun daruak ba akordu kontribuisaun finanseira ba objetivu dezenvolvimentu sustentável entre Repúblika Demokrátika Timor-Leste no Estadu Unidu Amérika (EUA) liuhosi Ajénsia Estadu Unidu ba Dezenvolvimentu Internasionál (USAID), ne’ebé asina ona iha loron 18 maiu 2021.
“Akordu ne’e atu haree ba dezenvolvimentu setór naun petrolíferu no reforsu governasaun di’ak ba períodu tinan 2020 to’o 2025,” Ministru Prezidénsia Konsellu Ministru, Fidelis Manuel Leite Magalhães, hateten hafoin reuniaun ezekutivu, iha Palásiu Governu kuarta ne’e.
Notísia relevante :Governu Esforsu Hasa'e Kreximentu Ekonómiku TL Ba 7,2% Iha 2020
Alterasaun ne’e ho nia objetivu EUA atu aumenta valór kontribuisaun finanseira, hosi montante millaun $36,6 ba millaun $53,6.
Nune’e mós, ezekutivu sira halo alterasaun dahuluk ba akordu kontribuisaun finanseira ho objetivu dezenvolvimentu sustentável entre Repúblika Demokrátika Timor-Leste no EUA, liuhosi USAID, ne’ebé asina ona iha loron 27 marsu 2014.
“Akordu ne’e atu reforsa kapasidade institusionál no umana ba dezenvolvimentu períodu tinan 2014 to’o 2019,” nia akresenta.
Alterasaun ida-ne’e ho objetivu atu revee data ikus akordu nian ba loron 30 setembru 2025 hodi permite konkluzaun atividade sira ne’ebé hosi kontribuisaun finanseira.
Iha ámbitu ne’e, KM hili Ministru Finansa hodi reprezenta Governu Timor-Leste atu asina akordu rua.
Jornalista : Antónia Gusmão
Editora : Julia Chatarina
