BAUCAU, 10 maiu 2023 (TATOLI) – Udan durante loron-tolu estraga estrada diresaun hosi suku Laisorulai ba Lelalai, postu Laga no mota Basarwai suku Afaloicai, postu administrasaun Quelicai, munisipiu Baucau.
Diretór Serbisu Munisipál Obra Públiku Baucau, Pedro Alexandre Guterres Perreira, esplika, liuhosi informasaun hosi komunidade no ekipa tékniku to’o iha terrenu identifika estrada iha fatin rua refere hetan estragu kauza hosi udan durante loron-tolu ne’ebé akontese iha munisípiu Baucau.
“Ami simu orientasaun hosi ministériu atu halo kontaktu ho kompañia lokál sira atu halo serbisu normaliza hikas ho tipu kontratu kada loron,” Diretór Serbisu Munisipál Obra Publiku Baucau informa ba Agência TATOLI iha Vila Nova, kuarta ne’e.
Estrada hosi postu Quelicai, suku Laisorulai ba suku Lelalai hetan estragu iha loron tersa, 09 maiu ne’ebé kuaze kilómetru 100 kotu, ne’ebé fó impaktu ba transporte públiku ba suku Lelalai.
Enkuandu iha postu Baguia akontese iha semana kotuk iha área mota Basarwai ligasaun entre suku Afaloicai ba Uatucarbau, munisípiu Viqueque ameasa atu kotu kauza hosi udan.
“Ita agora iha faze aprosimasaun ho kompañia ne’ebé iha ekipamentu maibé balun okupadu ho projetu iha terrenu,” Pedro Guterres akresenta.
Kompañia ne’ebé Obra Públika Baucau halo ona kontaktu mak Jova unpesóal.Lda ho DB Ingracia unipesóal.Lda maibé sei seidauk iha serteza tanba sei okupadu ho projetu balun iha terrenu.
Notísia relevante: Estrada ba sentru votasaun 16 iha Baucau seidauk hadi’a
Jornalista : Natalino Belo
Editór : Evaristo Soares Martins
