BAUCAU, 11 maiu 2023 (TATOLI)- Kompañia responsavél projetu hahú konstrui edifísiu foun Serbisu Munisipál Edukasaun Baucau.
Diretór Serbisu Munisipál Edukasaun Baucau, Augusto Ornai Ximens, esplika, projetu refere parte hosi Programa Dezenvolvimentu Integradu Munisipál (PDIM) tinan-2023 ne’ebé kompañia Caidaralata Unpesóal.lda mak sai manan-na’in ba projetu refere.
“Tinan oin bainhira finaliza bele fasilita ona serbisu atendimentu iha setór edukasaun iha Baucau,” Diretór Serbisu Munisipál Edukasaun Baucau informa ba Agência TATOLI iha Vila Nova, kinta ne’e.
Prosesu ba projetu refere prepara hosi Edukasaun Baucau hodi hetan aprovasaun iha Reuniaun Konsultivu Munisipál hodi kontinua deskute iha Governu no aprova iha Parlamentu Nasionál inklui promulga hosi Prezidente Repúblika.
Augusto Ximenes agradese ba entidade hotu liuliu membru asembleia Konsellu Konsultivu Munisipál ne’ebé aprova planu refere tanba konsidera edifísiu atuál difikulta ba atendimentu iha setór edukasaun.
Edifísiu refere ho medida 10x20m² ne’ebé sei koloka departamentu inklui seksaun, divizaun sira ho fasilidade hanesan moru, jardín no fatin.
Projetu konstrusaun edifísiu edukasaun Baucau hahú selebra kontratu entre Autoridade Admistrasaun Munisipál ho kompañia iha loron 30 fulan-marsu ho durasaun serbisu tinan-ida hosi totál orsamentu $ 448.932,51.
Jornalista : Natalino Belo
Editór : Evaristo Soares Martins
