Buletin votu iha Baucau hamutuk rihun 100-resin
BAUCAU, 12 maiu 2023 (TATOLI) – Materiál sensitivu no la’os-sensitivu ba elisaun parlamentár komposta hosi buletin votu hamutuk rihun 100-resin to’o ona iha munisípiu Baucau.
Diretór Sekretariadu Tékniku Administrasaun Eleitorál (STAE) munisípiu Baucau, Natividade Freitas Guterres, esplika, prosesu transportasaun materiál hirak-ne’e direitamente akompaña hosi Prezidente Autoridade Munisipál Baucau inklui hetan seguransa másimu hosi Komamdu Polísia Nasionál Timor-Leste (PNTL) Baucau.
“Ami agora prepara teknikamente hodi prepara ba aban halo pakotementu tanba ne’e husu fiskál sira aban tenke prezensa,” Diretór STAE Baucau hateten iha Vila Nova, sesta ne’e.
STAE Baucau husu fiskál kada partidu polítiku no observadór sira atu akompaña prosesu pakotementu ne’ebé sei hahú dahuluk ho materiál la’os sensitivu no bainhira finaliza kontinua kedas sensitivu antes halo distribuisaun ba kada sentru vitasaun.
“Pakotementu hahù aban to’o loron 19 maiu ho durasaun tempu loron-hitu,” Natividade Guterres akresenta.
Tuir planu prosesu pakotementu materiál la’ós-sensitivu loron-rua no sensitivu presza fó atensaun ho kuidadu tanba sei halo verifikasaun ba buletin votus nune’e bele iha rezultadu ne’ebé justu.
Total materiál sensitivu no la’ós-sensitivu ne’ebé distribui hosi nasionál hamutuk hotu item 49 komposta hosi materiál sensitivu livru buletin votu hamutuk 2.208 ka buletin votu hamutuk 110.400, kabina votu hamutuk 550, selus 5.400, akta operasaun 1.800, livru votante 1.800 no karimbu hamutuk 3800.
Jornalista : Natalino Belo
Editór : Evaristo Soares Martins
