iklan

HEADLINE, SAÚDE

Espesialista : Labele fó telefone ba labarik halimar Game tanba impaktu ba matan

Espesialista : Labele fó telefone ba labarik halimar Game tanba impaktu ba matan

Xefe departamentu Oftamolojista no Estomatoljia HNGV, dra. Julia Rosalina Cesar Magno, iha estúdiu Tatoli, hodi entrevista kona-ba prevensaun no tratamentu moras matan iha Timor-Leste, sesta (05/12/2023). Imajen Tatoli/Felicidade Ximenes

DILI, 12 maiu 2023 (TATOLI) Xefe Departamentu Sentru Matan Nasionál iha Hospital Nasionál Guido Valadares (HNGV), Julia Rosalina Cesar Magno, husu ba inan-aman sira hodi evita fó telefone ba labarik sira atu halimar Game tanba fó impaktu maka’as ba sira-nia matan.

“Ita agora daudaun mundu modernu, buat hotu iha, entaun labarik sira mós hatene halimar game iha telefone laran, ida ne’e perigu tebes ba sira-nia matan tanba sira haree kle’ur telefone nia radiasaun maka’as bele estraga sira-nia matan.  Ha’u husu ba inan-aman sira evita fó telefone ba oan sira”, Julia Rosalina Cesar Magno relata iha Edifísiu TATOLI, ohin.

Nia dehan, bainhira ema utiliza beibeik telemovel iha fatin ne’ebé mak nakukun no halo telemovel ne’e naroman demais liu, halo ema-nia matan ne’e malahok daudaun no matan maran.

“La’os ba labarik kiik-oan de’it maibé ba ema hotu-hotu ne’ebé kaer telemovel tenke halo prevensaun tanba iha impaktu ba matan”, nia informa.

Atu halo prevensaun ba ida ne’e, nia dehan, inan-aman sira mak iha dever tomak atu labele fó telemovel ba labarik sira no eduka labarik sira husi idade ki’ik hodi labele fó telemovel.

“Se labarik sei ki’ik mak ita eduka ho telemovel de’it otomatikamente bainhira boot tama ba idade joven ne’e, sira-nia matan malahok no matan maran daudaun”, nia adianta.

Nia informa, joven sira barak mak mai konsulta matan ne’e mesak matan moras tanba impaktu ne’e husi telemovel no haree ka lee demais iha komputadór, agora daudaun pasiente sira mai ne’e maioria matan moras.

“Ha’u hakarak fó mensajen ba labarik sira katak hamenus ona halimar telemovel, hamenus ona halimar game, atu evita kedas agora bainhira tama ba idade joven”, nia konklui.

Joranalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!