Povu Manatuto konsidera figura Taur lori povu ba moris di’ak

MANATUTO, 13 maiu 2023 (TATOLI)—Fundadór Partidu Libertasaun Populár (PLP), Hugo Maria Fernandes, garante kaixa PLP nian iha eleisaun parlamentár 2023 ne’e iha Manatuto sei la mamuk, tanba povu konsidera Taur Matan Ruak hanesan figura ida-ne’ebé lori povu no nasaun ba moris di’ak.

Notísia Relevante: PLP kontinua esforsu hodi halakon Lei Pensaun vitalisia

”

Ita garante kaixa PLP nian iha eleisaun parlamentár iha Manatuto sei la mamuk, tanba ha’u fiar povu konsidera Taur Matan Ruak hanesan figura ne’ebé bele lori povu no nasaun ne’e ba moris di’ak,” Hugo Fernandes hateten iha kampaña eleitorál ho tipu diálogu, iha postu administrativu Manatuto Vila, munisípiu Manatuto, sábadu ne’e.

Nia hateten, PLP garante iha tinan lima (5) sei liberta povu hosi ki’ak no lori povu ba naroman, nune’e husu ba Manatuto-oan atu vota ba númeru 3 no vota ba Taur Matan Ruak.

“Tanba ne’e, vota ba númeru 3, vota ba Taur Matan Ruak, vota ba mudansa no vota moris di’ak ita hotu nian. Nune’e, ita sei kontinua programa Uma Naronam ba Povu ba ita, programa sesta bázika, bolsa méritu, bolsa parsial, no ita-nia veteranu 0-3 no 4-7 sira,” nia dehan.

Entretantu, programa prioridade PLP ne’ebé durante ne’e hato’o nu’udar kompromisu iha kampaña hamutuk 10 mak hanesan hanesan:

1. Sosiál;
2. Edukasaun;
3. Kria Fundu $1 biliaun ba Setór Produtivu ho funan 0% to’o 3%;
4. Turizmu, transporte telekomunikasaun;
5. Fundu moradór/komunidade tradisionál, joven, artista, pintór, feto, desportu, kada suku $30,000 ba fulan neen (6) to’o tinan ida (1);
6. Ambiente;
7. Espanda projetu komunitáriu ba aselera dezenvolvimentu rurál liu-liu estrada, dada bee-moos, eletrisidade, eskola, klínika, Uma Naroman ba Povu, nsst;
8. Halo Ordenamentu Territóriu no Rekualifikasaun Sidade Dili;
9. Efisiénsia, Efikasia sustentabilidade iha Governasaun;
10. Investe iha no Moderniza sistema servisu Saúde no redús pasiente ba rai-li’ur.

Jornalista : Osória Marques

Editór       : Cancio Ximenes