iklan

JUSTISA, DILI, HEADLINE

Kazu omisídiu Loromata arguidu na’in-haat prizaun preventiva

Kazu omisídiu Loromata arguidu na’in-haat prizaun preventiva

DILI, 15 maiu 2023 (TATOLI) – Tribunál Distritál Dili (TDD) liuhosi primeiru interrogatóriu, deside arguidu na’in-haat hetan pena prizaun preventiva, na’in-lima aplika medida koasaun aprezentasaun periódika no arguidu na’in-rua só aplika de’it Termu Identidade Rezidénsia (TIR).

‘’Entaun arguidu nain-haat, Juíz aplika medida koasaun prizaun preventiva, ba arguidu nain-lima, Juíz aplika medida koasaun aprezentasaun periódika no ba arguidu nain-rua só aplika de’it Termu Identidade Rezidénsia’’, Defensór Públiku, Segio Dias Quintas, dehan ba jornalista sira iha TDD, ohin.

Iha Interrogatóriu dahuluk, arguidu 11, Ministériu Públiku promove krime tolu, mak krime arma branka, omisídiu simples no ofensa korporais grave.

‘’Rezultadu hosi interrogatóriu ne’e, Juíz haree katak iha indísiu forte, arguidu nain-haat prátika krime omisídiu simples, ba arguidu nain-lima iha indísiu forte, sira prátika krime arma branka no ba arguidu nain-rua laiha indísiu ne’ebé forte kona-ba prátika krime, entaun ida ne’e mak despaisu Juíz nian ohin kalan nian’’, Quintas haktuir.

Quintas subliña, arguido na’in-haat ho inisiál LA, FA, JTS no DM, Juíz aplika prizaun preventiva tanba iha indísiu forte sira prátika krime omisídiu simples, krime arma branka no krime ofensa korporais grave.

Arguidu nain-lima ho inisiál TA, ADR, CJ, AM no JS, Juíz aplika medida koasaun aprezentasaun periódika tanba iha indísiu forte ba prátika krime arma branka.

Ba arguidu na’in-rua ho inisiál HGMS no MSC la iha indísiu forte prátika krime ruma, tanba ne’e Juíz aplika de’it TIR.

‘’Medida koasaun ne’ebé Juíz aplika ba arguidu 11. Parte defeza hanoin katak medida koasaun ne’e adekuada no proporsionál tanba ne’e la’os desizaun maibé aktu prosesuál ida atu asegura arguidu nia prezensa.

Prosesu primeiru interrogatóriu prezide husi Juiza Ana Paula Fonseca, Ministériu Públiku representa husi Prokuradór Osorio de Deus no arguidu nain sanulu resin ida hetan asisténsia legál husi Defensór Públiku, Sergio Dias Quintas.

Kazu Loromata akontese iha 13 maiu, rezulta joven Bernadino Ximenes Brito, idade 20, lakon vida, hakanek FAG iha parte ulun, ho idade 20, hakanek SLP nia konoruk no ain-tur, ho idade 19.

Notísia relevante : Kazu Loromata, KRAM bolu urjente líder PSHT no Federasaun Wushu

TATOLI

iklan
iklan

Leave a Reply

iklan
error: Content is protected !!