MS-MF selebra akordu janela únika atu kontrola aimoruk tama TL
DILI, 15 maiu 2023 (TATOLI) – Ministériu Saúde (MS) ho Ministériu Finansas (MF) asina akordu janela únika atu kontrola aimoruk no medikamentu sira ne’ebé mak tama mai iha Timor-Leste.
Ministra Saúde Odete Maria Freitas Belo, informa akordu ohin ne’e ko’alia kona-ba aimoruk sira ne’ebé mak tama mai, presiza rejista no presiza hetan lisensa.
“Bainhira atu halo rejistrasaun ba aimoruk ka atu hetan lisensa ba aimoruk, mós ajuda ami bele kontrola aimoruk ida ne’ebé mak tama mai iha ita-nia nasaun laran, aimoruk sira ne’ebé mak ita bele deteta no aimoruk ne’ebé la tuir dalan sira bele haree”, Odete Belo hateten bainhira remata asina akordu iha salaun MS Caicoli, ohin.
Nia dehan, atu kontrola aimoruk sira ne’e mak MF uza sistema janela únika, entaun ida ne’e ajuda tebes atu haree liuhosi online de’it.
“Espesialmente iha finansa nian tanba ita uja Asycuda nia programa single window (sistema janela únika) ida ne’e ajuda ita, uluk ne’e ita ba hakerek ho liman de’it, maibé ho sistema ne’ebé mak iha ajuda ita bele liuhosi online de’it no tama diretamente ba sistema atu bele fó lisensa ba SAMES bele servisu online hodi hasai aimoruk sira husi Alfandega nian”, nia esplika.
Iha fatin hanesan, Ministru Finansas, Rui Augusto Gomes, hateten akordu ida ne’e entre MS ho MF atu adere membru ida janela únika atu kontrola aimoruk sira.
“Janela únika agora daudaun, entidade Governu nian iha sia mak iha laran, agora sei aumenta tan rua, sira halo importasaun ba aimoruk no ekipamentu mai husi rai liur atu fasilita prosesu mobilizasaun movimentu sasan sira tama husi rai liur mai”, Rui Augusto Gomes subliña.
Nia afirma, iha akordu ne’e atu formaliza, la’os ona atu kontrola, tanba formaliza ida ne’e hanesan prosesu birokrasia no prosedementu sira ne’e fasil liuliu online katak aimoruk sira ne’ebé mak tama mai rejista hotu kedas iha sistema laran, la presiza atu hein alfandega hodi hein tempu naruk atu foti ekipamentu no aimoruk sira.
Janela Únika Nasionál mak portál aduaneiru ida ne’ebé komersiante sira bele hatama dokumentu hotuhotu relasinadu ho komérsiu nian no bele asesu informasaun relevante hotuhotu kona-ba komérsiu nian através portal eletróniku ida úniku. Portal ne’e koneta Autoridade Aduaneira ho ajénsia Governu nian ne’ebé trata ho movimentasaun ema ka merkadoria sira, inklui autoridade tributária, imigrasaun, kuarentena, saúde, transporte, agrikultura, peska, negósiu estranjeiru no Banku Sentrál.
Iha tinan 2017, Governu liuhosi Konsellu Ministru aprova rezolusaun Nú. 24/2017 hodi estabelese NSW liuhusi sistema ASYCUDA World ne’ebé utiliza ona husi Autoridade Aduaneira iha tutela Ministériu Finance nian dezde 2018.
Jornalista : Felicidade Ximenes
Editór : Zezito Silva
