Tenente Coronel “Sarai” lakon vida tanba sofre estroke emorrajia
DILI, 15 maiu 2023 (TATOLI) – Tenente Coronel Deolindo da Costa Amaral “Sarai”, segunda kalan ne’e hakotu is iha Hospitál Nasional Guido Valadares (HNGV) tanba sofre moras estroke emorrajia.
Diretór Klíniku Hospitál Nasional Guido Valadares HNGV Marcelino Correia, hateten Tenente Coronel Falintil Forsa Defeza Timor-Leste (F-FDTL) Deolindo da Costa Amaral alias Sarai hakotu is iha Unidade Kuidadu Intensivuv (ICU, sigla inglés) tanba ran sai hosi nia kakutak.
“Tenente Coronel Falintil Forsa Defeza Timor Leste (F-FDTL) ne’e mate ho moras estroke emorrajia signifika ran sai iha nia kakutak tanba tensaun aas”, Marcelino Correia informa ba TATOLI via telefone, ohin.
Nia hateten, veteranu ne’e tama iha ospitál iha loron 28 fulan abril, interna iha sala VIP depois muda fali ba iha sala medisina interna no ohin muda ba iha sala ICU hafoin hakotu nia vida iha oras 16:30.
“Ohin dadeer komadante ne’e grave ona, entaun profisionál saúde sira halo atendimentu maibé ohin lokraik labele salva ona”, nia afirma.
Xefe Departamentu Emerjénsia (HNGV), Eldegar Martins, dehan Tenente Coronel antes ne’e moras iha Metinaro hafoin ambulánsia lori mai HNGV.
“Ita-nia pasiente ne’e moras iha Metinaro mak ambulánsia lori mai halo tratamentu iha ne’e durante semana ida ho balun no ohin hakotu iis”, Eldegar Martins haktuir.
Saudozu Aswa’in Deolindo da Costa Amaral “Sarai” moris iha Aldeia Abere, Suku Luro, Postu Administrativu Luro, Munisípiu Lautem. Saudozu “Sarai” halai ba ai-laran iha tempu funu hodi luta no dedika nia-an to’o hetan independénsia.
Depois indepedénsia, Saudozu Deolindo sai membru F-FDTL, sai Kapitaun no komadante água no saneamentu iha komponente terrestre iha Metinaru.
Matebian Sarai nia mate isin translada ona ba nia rezidénsia iha Metinaru hodi hein desizaun husi família no Estadu molok lori ba haloot iha nia moris fatin Luro.
Jornalista : Felicidade Ximenes
Editór : Zezito Silva
