MALIANA, 16 maiu 2023 (TATOLI) – Eletrisidade Timor-Leste, Empreza Públika (EDTL,E.P) Munisípiu Bobonaro la deteta kliente sira halo ligasaun ilegál durante sistema pulsa elétrika falla.
Notísia relevante: EDTL Bobonaro preparadu fornese enérjia elétrika ba sentru votasaun
“Ami-nia kliente iha munisípiu Bobonaro, ema sira-ne’e iha kompreensaun aas tebes, ami sempre motiva sira. Ita-nia sistema mak ladi’ak loron tolu ka haat mós sira laiha hanoin halo ligasaun ilegál tanba ita halakon ita-nia nasaun,” Jerente EDTL,E.P Munisípiu Bobonaro, Mário de Jesus, informa ba jornalista sira, iha kna’ar-fatin, tersa ne’e.
Koordenadór Mário lori empreza estatál nia naran agradese ba kliente sira-nia kompreensaun no kolaborasaun utiliza enérjia elétrika tuir regra no lei ne’ebé estabelese ona.
“Sira konstribui ona ba ita-nia munisípiu Bobonaro hodi hasa’e reseita ba ita-nia nasaun, tanba ne’e ha’u husu kliente sira atu nafatin mantein ho ida-ne’e. Ba oin labele halo ligasaun ilegál, tanba bainhira tékniku sira ba halo observasaun mak hetan, sei aplika multa tuir ampere ne’ebé ita-boot sira uza,” Mário apela
Enkuantu tuir dadus totál kliente EDTL,E.P munisípiu Bobonaro hamutuk uma-kain 16,991.
Notísia relevante: EDTL Bobonaro reinstala kontadór iha postu administrativu haat
Jornalista : Sérgio da Cruz
Editór : Evaristo Soares Martins
