EDTL Bobonaro preparadu fornese enérjia elétrika ba sentru votasaun

MALIANA, 27 marsu 2023 (TATOLI) – Koordenador Eletrisidade Timor-Leste, Empreza Públika (EDTL,E.P), munisípiu Bobonaro, Mário de Jesus, hateten téknku sira preparadu atu instala enérjia elétrika hodi fornese ba sentru votasaun no estasaun votu ne’ebé la asesu elétrika hodi fasilita eleisaun parlamentár 21 maiu tinan 2023 la’o ho susesu.

Notísia relevante: STAE Bobonaro identifika estrada ba sentru votasaun 36 presiza hadi’a

“Ha’u rasik orienta hotu ona ba ha’u-nia kolega sira-ne’ebé destaka iha postu, katak fatin sentru votasaun ne’ebé identifika tiha ona hosi STAE, sira-nia dadus fó tiha mai ami,” nia hateten.

EDTL Bobonaro mós prontu fornese liña elétrika 100% ba atividade kampaña eleitorál ne’ebé hala’o hosi partidu polítiku sira ne’ebé sei hala’o iha loron 19 fulan-abríl ne’e to’o apuramentu munisipál.

“Ami sei asegura ahi 24 oras labele mate, sé kazu keta aban bainirua karik ha’u la hatene, maibé dehan ahi atu mate arbiru laiha ida, ne’ebé ami sei apoiu téknika ho másimu,” nia promete.

Enkuantu STAE mós identifika sentru votasaun hamutuk 42 iha munisípiu Bobonaro mak la asesu liña elétrika hanesan postu Atabae iha tolu, komposta hosi sede aldeia Lolocolo, ensinu públiku Malehan no sede suku Rairobo.

Hosi parte postu Balibo ualu mak hanesan EP Cowa, sede aldeia Badutmean, EP Lalis, EP Railuli, Ensinu Báziku Filiál (EBF) Surilaku, EP Duaderok, EP Rai-Ulun no sede aldeia Ferik-Katuas.

Enkuantu iha postu administratuvu Bobonaro 11 mak hanesan sede aldeia Odelgomo, EP Mazop, sede aldeia Beamoas, sede aldeia Holbese, EBF Holsa Taz, EBF Mabelis, EBF Leber Taz, sede aldeia iha suku Soilesu, sede aldeia ida ho suku Ilat-Laur no EBF Mape-Op.

Hosi postu administrativu Cailaco iha ualu mak hanesan sede aldeia Atudara, sede suku Goulolo, sede suku Genulai, sede aldeia Tatelori, EP Poerema, sede aldeia Aitutu no sede suku Raiheu.

Enkuantu postu administrativu Lolotoe iha neen mak hanesan sede aldeia Oburo, sede aldeia Anon, EBC Guda Taz, EP Atus, EP Saligolo no EP Tepa.

Hosi parte postu administrativu Maliana iha sentru votasaun neen mak la asesu elétrika hanesan sede aldeia Raifun foho, EP Nunutana, sede aldeia Maganutu, EBF Mabil-Oa, EP Saburai no EP Pipgalak foho.

Enkuantu munisípiu Bobonaro iha sentru votasaun 150 no totál estasaun votasaun 170 ne’ebé kobre suku 50, postu administrativu neen, no tuir dadus 2022 totál eleitor ne’ebé tuir eleisaun prezidensiál hamutuk na’in-70,311.

Notísia relevante: STAE Bobonaro hahú rekruta ofisiál eleitorál 1.700

Jornalista   : Sergio da Cruz

Editór         : Evaristo Soares Martins