OÉ-CUSSE 16 maiu 2023 (TATOLI) – Komunidade sira hosi suku Naimeko, Bobokase no suku Bobometo, promete sei kontribui hodi oferese rai uma no plantasaun iha implementasaun projetu estrada nasionál hosi sub-rejiaun Pante Makasar liga sub-rejiaun Oésilo.
Notísia relevante: PM Taur felisita Autoridade RAEOA hatuur fatuk dahuluk ba estrada nasionál Oésilo
Xefe suku Naimeko, Marcos Liu Abi, iha ona koñesimentu liuhosi sensibilizasaun hosi ekipa tékniku hosi Diresaun Rejionál Infraestrtura, Diresaun Agrikultura no Terra Propriedade, katak, uma sei troka uma, plantasaun no rai sei selu, tuir promesa ne’ebé autoridade hato’o ona antes.
“Primeiru komunidade liuliu ha’u-nia suku Naimeko, promete ona sei oferese rai metru-23, sorin-sorin metru-11,50, ne’e oferese gratuita, hodi kontribui ba dezenvolvimentu atubele loke estrada ba povu tomak,” Marcos Liu, ko’alia ba jornalista sira iha aldeia Oébaha, suku Bobometo, Oé-Cusse, tersa ne’e.
Daruak, karik projetu ne’e kona komunidade nia uma, ai-oan, rai no fasilidade seluk, Governu sei troka, maibé liuhosi konkordánsia parte rua, komunidade no autoridade tenke aprosima didi’ak. Nune’e obra ne’e bele la’o ho di’ak, medida aprosimasaun liuliu sira-ne’ebé afetadu.
Datoluk, ha’u husu ba Autoridade liuliu diresaun tolu, obra públika, agrikultura no terra propriedade, atu idak-idak hatene nia responsabilidade, presiza identifika ai-horis sira-ne’ebé poténsia ba ekonomia, rai ne’e presiza hatene nia istória rai Estadu ka komunidade nian.
Iha fatin hanesan, Xefe suku Bobokase, Sebastião Cob, agradese ba VIII Governu Konstitusionál, liuhosi Autoridade RAEOA, ne’ebé ohin halo ona lansamentu ba konstrusaun estrada nasionál Tono ba Oésilo sei afeta direta ba suku tolu, Bobokase, Naimeko no Bobometo.
“Iha nia implementasaun, karik afeta ba ha’u-nia komunidade nia rai, ai-oan no bee-posu, presiza aprosimasaun, komunidade prontu oferese rai tanba ne’e dezenvolvimentu ba povu tomak, maibé Governu bele ba ko’alia ho sira, didi’ak, nune’e obra ne’e bele kontinua la’o, importante sira hatene, iha kompensasaun ka lae,” nia fó hanoin.
Tuir líder komunitária ne’e hateten, mekanizmu ne’ebé uza iha suku Bobokase kuandu konkorda malu liuhosi aprosimasaun, labele tama ho nonok.
“Ha’u hanesan xefe suku bele komunika ho Governu komunika mós kompañia, oinsá bele kontribui ho hanoin rasik no laran malirin, mekanizmu ne’e bele aprosima, nune’e bele iha konkordánsia ba kontribuisaun exemplu kona ai-horis, rai bee-posu no seluk tán, ita bele esplika ba povu atu komprende, buat sira-ne’e kaundu ita halo, ha’u hanoin sei laiha problema ba implementasaun projetu ne’e,” nia katak.
Notísia relevante: Autoridade RAEOA aprova deliberasaun halo pagamentu ba afetadu projetu ZEESM
Bento Bobo, nu’udar lia-na’in suku Bobometo, esplika, karik uma, plantasaun, no rai, sei troka fali, sei Autoridade halo tuir ida-ne’e.
“Ami nu’udar komunidade kontente, maibé sei bainhira lala’ok projetu ne’e lala’o tuir saida mak ohin mensiona, sei tenta nafatin atu oinsá iha nia solusaun, tanba ami mós hakarak estrada di’ak mai suku,” nia afirma.
Tuir nia, tanba iha suku Bobometo iha aldeia haat, mai sei sai afetadu, hahú hosi aldeia Oébaha, Oénoah, Hoineno no Usapikolén.
Entretantu, ezekuta projetu estrada nasionál ne’e hosi kompañia internasionál PT Waskita Karya Sei hahú hosi eis merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru-18.
Notísia relevante: Xefe Governu husu Atoni-oan hamutuk ho Autoridade RAEOA dezenvolve Oé-cusse
Jornalista : Abílio Elo Nini
Editór : Evaristo Soares Martins
