PNTL garante seguransa durante materiál eleisaun iha STAE Baucau

BAUCAU, 16 maiu 2023 (TATOLI) – Komandu Polísia Nasionál Timor-Leste (PNTL) munisípiu Baucau garante seguransa másimu durante prosesu pakotementu to’o distribuisaun materiál eleisaun ba sentru votasaun.

Komandante PNTL munisípiu Baucau, Superintendente Xefe, António de Sá, esplika, PNTL iha devér halo seguransa ba prosesu hotu kona-bá eleisaun inklui asegura prosesu pakotementu materiál sensitivu no la’ós-sensitivu to’o distribusaun ba kada sentru votasaun iha munisípiu Baucau.

“Ita-nia membru sira preparadu atu asegura materiál sensitivu no la’ós-sensitivu to’o prosesu distribusaun ba sentru votasaun,” Komandante PNTL munisípiu Baucau hateten iha Vila Nova, kuarta ne’e.

PNTL Baucau iha planu feitu ho objetivu atu fó asisténsia seguransa ba Sekretariadu Tékniku Admistrasaun Eleitoral (STAE) no Komisaun Nasionál Eleisaun (CNE, sigla portugés) liuliu ligadu ho eleisaun parlamentár.

“PNTL prontu asegura seguransa atu buat hotu la’o iha ámbitu pás no estabilidade nune’e bele susesu tuir ita hotu-nia espetativa,” Superintendente Xefe António de Sá akresenta.

PNTL Baucau destaka membru hamutuk na’in-neen hodi asegura seguransa iha salaun apuramentu munisípiu, liuliu garante seguru ba materiál la’ós-sensitivu no sensitivu antes distribui ba sentru votasaun iha loron-20 maiu.

Jornalista     : Natalino Belo 

Editór            : Evaristo Soares Martins