DILI, 17 maiu 2023 (TATOLI) – Koordenadora OPD Obstetrisia Gynekolojia no Responsável ba Kolposkopy senter iha Hospitál Nasionál Guido Valadares (HNGV), Parteira Seniór, Clotilde Neves de Sousa, dehan dezde 2022 inan sira ne’ebé halo ezaminsaun ba moras serviks hamutuk 200 no na’in sia mak hetan pozitivu.
“Durante ita estabelese sentru kolposkopy iha Hospitál Nasionál Guido Valadares (HNGV) iha fulan maiu 2022 to’o agora, ita halo ezaminasaun ba ita-nia ina feton sira hamutuk 200, husi ne’e na’in sia mak pozitivu ba moras serviks ida ne’e”, Clotilde Neves de Sousa, afirma iha edifísiu TATOLI bainhira halo entervista Eskluziva, ohin.
Nia informa, iha ezaminsaun ne’e profisionál saúde sira deteta inan feton balun grave ona no haruka ba halo tratamentu iha Indonézia hodi kontinua ba halo operasaun.
“Ita halo ezaminasaun ne’e iha na’in neen mak ita labele halo tratamentu kontinua iha ne’e entaun ita haruka ba Indonézia atu kontinua kemoterapia no radioterapia tanba ita-nia ekipamentu iha ne’e seidauk kompletu”, nia esplika.
Nia dehan, iha pasiente ida mai ho kondisaun grave maibé la halo tratamentu kontinuasaun depois fila fali ba uza aimoruk tradisionál no ikus mate.
“Durante estabelese sentru ne’e to’o agora inan ne’ebé mak lakon vida iha na’in ida tanba sira sai fali ba la’o partikular nian hodi halo tratamentu tardisionál ikus lakon vida”, nia hateten.
Sentru kolposkopy ida ne’e, inan feto Polísia Nasionál Timor Leste (PNTL) sira mak mai barak halo ezaminasaun ba moras ida ne’e iha HNGV.
“Fatin ne’e inan hotuhotu iha munisípiu sira mai halo ezaminsaun ba moras serviks ida ne’e maibé barak liu inan feton sira polísia iha Munisípiu Dili hamutuk 80 resin mak mai halo ezaminasaun iha ne’e”, nia subliña.
Nia subliña, kona-ba rekursu umanu iha sentru kolposkopy sufisiente hodi atende ba pasiente sira ne’ebé mak halo ezaminasaun ba moras serviks ida ne’e.
“Ita-nia ekipamentu halo ezaminasaun sira ne’e sufisiente maibé kona ba operasaun nian mak seidauk sufisiente entaun durante ne’e ita transfere ba rai liur hodi halo tratamentu kemoterapia no radioterapia”, nia hateten.
Nia fó mensajen ba Governu katak se de’it mak ukun nafatin atu investe makas ba área saúde tanba populasaun barak mate, menus koñesimentu ba saúde no ekipamentu no medikamentu la iha atu apoia sira-nia saude .
Jornalista : Felicidade Ximenes
Editór : Zezito Silva
