Empreza Arial Consultant konluiu Planu Detelladu Enjenãria iha Ainaro Vila
AINARO, 17 Maiu 2023 (TATOLI) – Diretór Servisu Obras Públikas, munisípiu Ainaro, João Henrique de Aráujo, hateten empreza nasionál Arial Consultant parseria ho Yudia Consultant husi Indonézia, konklui ona Planu Detalladu Enjeñaria (DED, sigla iha inglés) hodi halo dezeñu ba reabilitasaun estrada urbana iha Ainaro Vila.
“Empreza finaliza ona levantamentu DED iha fulan abríl no agora sira sei halo preparasaun dokumentu no dezeñu BoQ hodi halo kálkulu orsamentu atu haruka ba Ministériu Obras Públikas (MOP) nasionál hodi loke konkúrsu públiku hodi hetan empreza manán-na’in ba implementasaun projetu ne’e”, João Henriquede de Araújo informa ba Tatoli, nia servisu fatin Ainaro Vila, kuarta ne’e.
Kestiona kona-ba bainhira mak implementa projetu ne’e, inklui montante orsamentu, dirijente responde MOP munisipál só iha responsalidade halo de’it supervizaun ba projetu no aloka orsamentu depende ba dezeñu BoQ, tuir estimasaun orsamentu husi konsultór.
João Henrique informa, Arial Consultant ho Yudia Consultant halo mos levantamentu DED ba estrada ligasaun entre suku Soro, postu administrativu Ainaro Vila no suku balun iha postu administrativu Hatu-Udu.
Distánsia reabilitasaun estrada urbana Ainaro Vila besik 20 km, enkuantu estrada ligasaun suku Soro ba Soru Kraik no kontinua ba postu administrativu Hatu-Udu iha 20 km resin.
Jornalista: Afonso do Rosário
Editora: Isaura Lemos de Deus
