DILI, 17 maiu 2023 (TATOLI)—Governu liuhosi reuniaun Konsellu Ministru (KM) aprova projetu dekretu Governu, ne’ebé aprezenta hosi Ministru Transporte no Komunikasaun, José Agustinho da Silva, kona-ba rejime pezu ka todan ne’ebé autoriza ba veíkulu transporte sira.
“Dekretu Governu ne’e define konjuntu pezu, prosedimentu no rejime infrasaun sira hodi kria sistema ida-ne’ebé efisiente no efikás iha kontrolu pezu veíkulu transporte sira ne’ebé sirkula iha territóriu nasionál,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Notísia relevante : https://tatoli.tl/2023/02/17/governu-lansa-baskula-ponte-ba-kamioneta-tula-sasan-iha-fronteira-batugade/
Portavós Governu dehan, durante ne’e kamioneta tula sasán, liu-liu kontentór, bainhira liu estrada seidauk iha rejime ida hodi regula movimentasaun.
“Ita hatene katak ita iha estrada sira ne’ebé mak dala barak kamioneta sira tula kontentór sira ho pezu boot, ne’ebé bainhira la regula maka sei kontribui halo a’at lalais dalan sira. Tanba ne’e maka Konsellu Ministru aprova rejime ida-ne’e hodi kontrola kamioneta sira ne’ebé tula sasán todan hodi labele halo a’at estrada sira,” governante ne’e esklarese.
Jornalista : Antónia Gusmão
Editora : Julia Chatarina
