DILI, 17 maiu 2023 (TATOLI) – Prezidente Partidu Kongresu Nasionál Rekostrusaun Timor-Leste (CNRT), Kay Rala Xanana Gusmão, husu ba fiskais partidu CNRT nian hamutuk rihun ualu ne’ebé sei akompaña eleisaun iha sentru votasaun sira iha territóriu no diaspora atu sai matadalan no eroi ba partidu ne’e hodi defende lia-loos bainhira mosu irregularidade ruma iha kontajen nia laran.
Sekretáriu-Jerál Partidu CNRT, Francisco Kalbuadi Lay, hatutan mensajen hosi Prezidente Partidu Kay Rala Xanana Gusmão ba fiskais katak tenke serbisu maka’as hodi lori CNRT filafali ba kaer ukun iha 2023-2028.
“Hakuak boot ba imi fiskais hotu iha rai-laran no rai li’ur. Avó Xanana husu fiskais hotu atu serbisu maka’as hodi defende lia-loos no justisa. Matan moris halo verifikasaun kuandu buat ruma laloos iha prosesu kontajen de votu. Husu ba imi hotu iha loron 21 depois de votasaun sai matadalan no eroi ba partidu ne’e, tanba serbisu sira hotu hosi inísiu to’o momentu ida ne’e partidu ho ninia estrutura tomak halo hotu ona. Agora, iha momentu ikus ida ne’e buat hotu partidu entrega ba fiskais hotu”, nia dehan.
Kalbuadi Lay salienta katak CNRT agradese ba fiscais hotu nia dedikasaun ba partidu ne’e, tanba hatudu ona dezde iha eleisaun prezidensiál tinan kotuk. “Ne’e duni iha eleisaun parlamentár ne’e, husu atu prepara-aan didi’ak, matan moris defende lia-loos. Tenke hatudu imi-nia brani iha sentru votasaun sira hotu-hotu”, nia afirma.
Tuir sekretáriu-jerál CNRT, tinan ida ne’e partidu aumenta númeru fiskais ba rihun ualu kompara ho tinan kotuk iha de’it rihun haat tanba Governu aumenta tan sentru votasaun sira iha territóriu. Nune’e partidu hakarak koloka nia fiskais ho másimu iha sentru no estasaun votu sira atubele akompaña prosesu eleisaun parlamentár bele la’o ho di’ak, justu no transparente.
“Fiskais rihun ualu ne’ebé ita sei koloka iha território inklui diaspora ne’e atu hateten de’it katak sira-nia prezensa atu defende direitu partidu nian, tanba sira hetan ona formasaun durante semana rua nia laran”, realsa.
Sekretariadu Tékniku Administrasaun Eleitorál (STAE) kria sentru votasaun 1.500 no estasaun votu 1.880 iha eleisaun parlamentár tinan ne’e.
Jornalista: Tomé Amado
Editora: Maria Auxiliadora
