PNTL Baucau la tolera komunidade perturba prosesu eleisaun
BAUCAU, 20 maiu 2023 (TATOLI) – Komandu Polísia Nasionál Timor-Leste (PNTL) munisípiu Baucau sei la tolera komunidade tantu pesóal no grupu atu perturba prosesu elisaun parlamentár ne’ebé sei realiza aban, 21 maiu.
Komandante PNTL munisípiu Baucau, Superintendente Xefi, António de Sá, agradese ba eroi no entidade hotu-hotu ne’ebé hamutuk tanba laiha pertubasaun ruma durante prosesu kampaña komísiu partidu polítiku iha munisípiu Baucau.
“Lei la autoriza atu eleitór sira ba ho kondisaun lanu, ne’e papél seguransa nian, la tolera ba individu no grupu uza atributu arte-marsiál no la tolera lori arma branka,” Komandante PNTL munisípiu Baucau hateten iha vila nova, sabdu ne’e.
Komandante PNTL Baucau apela ba kada komandante eskuadra iha postu administrativu neen tuir orientasaun hosi Komandu PNTL nasionál, katak hala’o knaar tuir lei eleitorál hanesan mantein distánsia metru 25 no labele halo intervensaun direita.
Nune’e tenke kolabora ho brigada sira antes foti desizaun hodi atua situasaun iha terrenu tuir misaun PNTL ne’ebé konsagra iha Konstitusaun Repúblika Demokrátika Timor-Leste (KRDTL) artigu 147 katak defende legalidade demokrátiku no garante seguransa interna.
“Papél PNTL no FALINTIL-FDTL iha ámbitu eleisaun importante katak hala’o misaun independente no transparánsia, laiha partidu no grupu,” Superintendente Xefe António de Sá akresenta.
António de Sá rekoñese kona-bá limitasaun rekursu tantu materiál no rekursu umanu nune’e husu ba entidade hotu kontinua kaer metin espíritu serbisu hamutuk atu nune’e fó susesu eleisaun parlamentár tinan-ne’e.
PNTL munisípiu hetan apoia membru PNTL hosi nasionál hodi destaka fó seguransa ba kada sentru votasaun hamutuk 150 iha suku 59, postu neen durante realizasaun prosesu elisaun parlamentár iha munisípiu Baucau.
Jornalista : Natalino Belo
Editór : Evaristo Soares Martins
