DILI, 21 maiu 2023 (TATOLI)—Prezidente Partido os Verdes de Timor (PVT), António Lela Huno heteten, iha Eleisaun Parlamentar (ElPar) tinan 2023, PVT sei passa minimu ho kadeira lima, hodi luta ba empregu iha Timor-Leste (TL).
“Ohin loron determinante, ba Partido Verdes nia luta. Ami define tiha ona, luta ba empregu, ne’ebe esperansa katak Os Verdes, bele passa hodi nune’e kontribui ba lian Joven foin sae nian iha Parlamentu, tantu Os Verdes ami servisu para bele asegura ba bareira. Ami fiar katak, ami bele pasa ho minimu kadeira lima,” Prezidente PVT, Lela Huno dehan ba jornalista hafoin tuir votasaun iha sentru votasaun Delta III, Comoro Dili, Domingu ne’e.
Nia hatutan, se pasa ho kadeira lima, PVT sei kontribui ba formasaun governu da-sia.
“Partidu FRETILIN no CNRT iha liu kbi’it atu bele bolu Partido kiik sira seluk, hodi kontribui ba ukun hamutuk,” nia hatutan.
Preziden Lela Huno apelu ba joven sira hotu, atu simu rezultadu husi eleisaun. Ba Partidu se mak manán, hamutuk kontribui ba konsolidasaun estadu, ida ne’ebe joven hotu ninia mehi.
“Hamutuk ita forma governu ida, pro-povu, pro-joven sira, loke empregu barak ba joven sira, hodi nune’e joven bele moris iha futuru ida ne’ebe diak iha sira ninia rai rasik,” nia dehan.
Aleinde ne’e, PVT mos prontu apoiu Partidu se deit hanesan, CNRT ou FRETILIN hodi adere ba koligasaun ou plataforma, atu ne’e bele kontribui ba nasaun ne’e, se karik Partido os Verdes liu bareira ho pursente ha’at.
“Ami nia problema mak ne’e, ami hakarak sai lian Joven nian ba iha governasaun ida foun. Ami hakarak Joven tenki partisipa ativamente iha prosesu hotu. Ida ne’e mak ami nia lian,” hateten Lela Huno.
Partido Os Verdes prontu simu rezultadu husi eleisaun, tanba povu mak desidi. Os Verdes nafatin agradese ba Maromak no matebian sira karik la pasa, ho esperansa sei prepara ba tinan 2028.
Reporter : Mirandolina Barros Soares
Editor : Armandina Moniz
