DILI, 21 maiu 2023 (TATOLI)- Prezidente Parlamentu Nasionál (PPN), Aniceto Longuinhos Guterres Lopes, hateten, partidu ne’ebé de’it mak manán eleisaun parlamentár tinan ne’e tenke servi povu.
“Sira ne’ebé mak manán tenke servi povu, ukun ho di’diak i sira ne’ebé la manán mós sira tenke asumi sira-nia responsablidade, serbisu maka’as nafatin ba interesse Estadu, interese povu ninian,” Aniceto Longuinhos Guterres Lopes bainhira remata ezerse nian votu iha sentru votasaun EBF Farol, domingu ne’e.
Prezidente Parlamentu Nasionál ne’e louva maturidade povu Timor-Leste nian tanba hahú hosi prosesu eleitorál to’o ohin loron buat hotu lao di’ak, kampaña eleitorál la’o di’ak, nu’udar povu, sidadaun Estadu direitu demókrátiku mais maduru, mais tasak liutan ezerse direitu demókrátiku iha rai ne’e.
“Ha’u hein katak buat hotu la’o di’ak to’o kontajen votu tuir kedas ho prosesu formasaun Governu i ha’u hein katak parte hotu hotu asumi ninian vitória, balun ne’ebé lakon mós tenke hatene asumi responsablidade,” Nia afirma.
Nia hateten, demokrasia mak ne’e, sé iha fraude ka iha krimi ruma karik iha dalan atu rezolve, hotu-hotu mantein kalma, la’o tuir regra, la’o tuir lei ne’ebé prevé para ke prosesu eleitorál la’o di’ak, lori rezultadu.
“Sé mak manán nia mak tenke manan, ida nee mak hotu-hotu nia objetivu, povu mak tenke manán no sentidu depois eleisaun, sé mak manán atu serbi povu. Serbi ho loloos, haree ba iha erru saida maka laloos iha pasadu, saida mak seidauk di’ak, tenke hadi’a atu ukun sira ne’e hotu tenke benefisia povu,” Aniceto adianta.
Tanba tinan 20 restauransaun independénsia ita hotu sei asiste, sente katak ukun durante tinan 20 iha fatin-fatin povu sei halerik iha área eletrisidade, iha área bee moos, ai-han ho infraestreutura bázika sira seidauk prontu liu liu iha setór edukasaun ho saúde.
“Ita sei iha dezafiu barak. Ha’u hein katak, eleisaun ida ne’e lori rezultadu ne’ebé halo sira ne’ebé ukun ne’e, tenke hasoru dezafiu sira ne’e, hodi rezolve duni problema povu nian. Responde duni expetativa povu nian no responde duni povu nian halerik”, PPN Aniceto konklui.
Jornalista: Natalino Costa
Editór: Rafael Ximenes de A. Belo
