DILI, 21 maiu 2023 (TATOLI) – Sekretáriu-Jerál Partidu Centro Ação Social Democrata Timor-Leste (CASDT), Gally Soares de Araújo, apela ba militante CASDT nomós juventude mileniál sira atu labele estraga votu ba partidu sira seluk, maibé fó votu ba CNRT hodi manán iha eleisaun parlamentár ne’e.
“Ha’u apela ba jerasaun foun sira hotu iha loron ida ne’e, liuliu sira ne’ebé mak moris iha tempu ukun-aan ne’e, hanoin didi’ak imi-nia futuru tanba ne’e vota ba númeru 12, vota ba maun Xanana atu nia bele dezenvolve fali rai ida ne’e hodi lori povu ba moris di’ak”, Gally Araújo apela hafoin ezerse votu iha sentru votasaun Eskola Amigo de Jesus, iha Lahane Orientál.
Nia dehan desizaun estrutura CASDT kompostu hosi prezidente, sekretáriu-jerál, organizasaun masa juventude, militante no simpatizante iha eleisaun tinan ida ne’e fó votu ba CNRT atu lori Xanana Gusmão sai Primeiru-Ministru. “CASDT hakarak Ezekutivu ida atu governa nasaun ba tinan lima ne’e tenke partidu ida ne’ebé iha kapasidade hodi hatuur ema loloos iha fatin ne’ebé loloos atu salvaguarda destinu nasaun nian”.
“Ita iha obrigasaun morál tomak atu fó apoiu másimu ba nia liuhosi ita-nia kontribuisaun votu konfiansa, tanba votu ida hanesan osan mean ida ba ita-nia líder istóriku ne’e. Ha’u enkoraja sidadaun no povu tomak iha rai doben ida ne’e atu ita hotu garante maioria absoluta ba CNRT, nune’e ita bele loke dalan hodi konsolida unidade nasionál”, nia afirma.
Gally Araújo esklarese katak pozisaun ida ne’ebé sira foti bazeia ba buat barak no tanba dinámika polítika inklui nesesidade povu nian, nomós konjuntura lubuk ida ne’ebé akontese iha nasaun ne’e maka sira deside no termina hodi tau votu hamutuk ba CNRT.
“Ami lakohi atu estraga votu, ami lakohi kompromete tan destinu povu nian ba tinan lima, maibé ita presiza unidade nasionál no presiza konsolida dezenvolvimentu nasionál atu ita bele lori povu iha rai ida ne’e ba moris di’ak ho nune’e maka ami sente katak ita-nia demokrasia fó dalan ba partidu ki’ik sira sai determinate”, salienta.
Jornalista: Tomé Amado
Editora: Maria Auxiliadora
