UNDERTIM: “Ukun karik tenke hadi’a uluk povu nia moris”
DILI, 21maiu 2023 (TATOLI)— Partidu Unidade Nasionál Democrática de Resistência Timorense (UNDERTIM), husu atu iha Governasaun foun ne’ebé mak ukun tenke hadi’a uluk povu nia moris.
”Husu ba partidu se de’it mak ukun karik tenke hadi’a uluk povu nia moris ida ne’e tanba ita haree tinan 21 ida maibé buat barak seidauk mudansa liuliu povu sira iha área rurál,” Francisco Guterres dehan ba TATOLI iha sentru votasaun Paiol Becusse kraik, suku Becora, Postu Administrativu Cristo Rei, Munisípiu Dili, ohin.
Nia dehan, partidu UNDERTIM, ohin, halo kompetisaun maibé karik liu barreira agradese tebes la liu barreira nafatin apoiu Governasaun ne’ebé mak ukun atu hadi’a povu nia moris.
“Bainhira ami-nia partidu la liu, ida ne’e la’ós problema maibé ida ne’e kompetisaun demokrasia ita tenke simu no nafatin koopera ho Governu para bele hatama setór privadu para investimentu internasionál mai hodi dezenvolve ita-nia rai-laran,” Nia esplika.
Entretantu, iha sentru votasaun paiol suku Becora, Postu Administrativu Cristo Rei, Munsípiu Dili iha sentru votasaun 12 no eleitór hamutuk 14.901.
Tuir observasaun TATOLI iha terenu katak situasaun la’o ho diak tanba hetan seguransa másimu husi Polisia Nasionál Timor Leste (PNTL).
Jornalista : Felicidade Ximenes
Editór. : Rafael Ximenes de A. Belo
