Aban-Sekretáriu Ezekutivu CPLP vizita Timor-Leste
DILI, 23 maiu 2023 (TATOLI) – Sekretáriu Ezekutivu Komunidade Ko’alia Lian Portugés (CPLP-sigla portugés) Zacarias Albano, sei vizita Timor-Leste iha 24 maiu.
“Ha’u sei vizita Timor-Leste iha loron 24-26 maiu tanba hetan konvite hosi autoridade nasaun nian,” dehan Zacarias liu hosi komunikadu ne’ebé Agência TATOLI asesu, ohin.
Nia dehan, konvite ne’e simu ona iha tinan kotuk no foin mak vizita iha semana ne’e nia-laran.
“Vizita ida ne’e reprezenta hanesan Sekretáriu Ezekutivu, atu observa eleisaun ne’ebé foin halo iha semana kotuk iha Timor-Leste”, nia dehan.
Xefe másimu komunidade Luzfona sei hasoru malu ho Prezidente Repúblika (PR), Primeiru Mimistru (PM) no sei hasoru malu mós ho partidu boot rua ne’ebé hetan asentu maioria iha Parlamentu Nasionál.
Aleinde ne’e, Zacarias sei hasoru malu mós Kardeal Dom Virgilio do Carmo no Kamara Komérsiu Indústria Timor-Leste.
Jornalista: Hortencio Sanchez
Editór : Zezito Silva
