MALIANA, 23 maiu 2023 (TATOLI) – Iha loron-tersa maizumenus tuku 09.00 akontese insidente enérjia elétrika soke badaen ida ho naran Guilhermino Afonso (40), to’o monu hosi uma-andár leten, iha suku Holsa, postu administrativu Maliana, munisípiu Bobonaro.
Vítima hetan insidente bainhira solda hela besi iha uma-andár ida nia leten, derrepente enérjia elétrika hosi kabu media-tensaun xoke direita rezulta ruin pedasuk ida monu sai, raan sai hosi no ibun to’o transporta kedas ba Hospital Referál Maliana.
Hafoin hetan tramemtu emerjénsia durante oras ida-resin médiku sira deside iha tuku 11:15 evakua pasiente ho aviaun ba Hospital Nacional Guido Valadares (HNGV), Dili, atu hetan tratamentu espesífiku.
“Vítima grave liu, primeiru nia xoke, tanba tuda-aan sees dook kuaze metru neen ne’e mak ninia ain rua ne’e tohar hotu, agora pasiente konsiente moras maka’as, ami halo propozitu ona. Agora ami prepara refere ba Dili, doutór sirurjia ortopedia maka sei trata pasiente ne’e,” Diretór Ezekutivu HRM, Bourdaloue Fernandes, informa ba jornalista sira.
Iha insidente ne’e rezulta enérjia eléttrika iha kapitál Maliana mate totál impaktu mós ba prosesu aprumentu munisipál ba rezultadu eleisaun parlamentár.
Vítima hela iha aldeia Rokon, suku Odomau, postu administrativu Maliana, no orijen hosi suku Gildapil, postu administrativu Lolotoe, munisípiu Bobonaro.
Jornalista : Sérgio da Cruz
Editór : Evaristo Soares Martins
