PNTL husu komunidade mantein kalma hodi hein rezultadu

DILI, 23 maiu 2023 (TATOLI) – Polísia Nasionál Timor-Leste (PNTL), husu ba komunidade sira atu mantein kalma hodi hein rezultadu eleisaun lejislativa 2023.
“Hakarak hato’o ba komunidade tomak, mai ita hotu hein rezultadu ne’ebé maka agora daudaun Komisaun Nasionál Eleisaun (CNE, sigla portugés) halo hela. Mai ita hotu simu ho laran malirin atu Governu foun mai, bele lori governasaun ne’e lao di’ak ba oin. Dala ida tán seguransa husu ba ita hotu tur hakmatek hodi rona rezultadu ba loron aban no bain rua, ita hotu sei simu rezultadu ne’ebé mak sei fó sai mai”, Portavoz PNTL, Superintendente Xefe Arnaldo Araújo hateten liuhosi konferénsia imprensa ne’ebé halao iha Komandu Jerál PNTL Caicoli, tersa ne’e.
Arnaldo hateten, hahú iha loron 21 maiu, realizaun eleisaun parlamentár situasaun kontroladu no kalma maske PNTL resjista insidente no asidente balun iha sentru votasaun, maibé ida ne’e la afeta situasaun seguransa iha teritóriu nasionál durante eleisaun.
“Situasaun hahú hosi eleisaun 21 to’o agora la’o di’ak no hakmatek, laiha buat ida mak akontese mesmu ke iha asidente balun no insidente balun, maibé la afeta ba situasaun em-jerál, tanba bele atua ho di’ak”, nia konklui.
Jornalista: Natalino Costa

