HEADLINE, SEGURANSA

PNTL investiga ona sidadaun Indonézia tenta vota iha Liquiça

PNTL investiga ona sidadaun Indonézia tenta vota iha Liquiça

Portavos Komandu Jeral PNTL, Superintendente Xefe, Arnaldo Araújo. Imajen Tatoli/Francisco Sony.

DILI, 23 maiu 2023 (TATOLI) – Portavoz Polísia Nasionál Timor-Leste (PNTL), Superintendente Xefe Arnaldo Araújo, informa Komandu PNTL liuhosi Departementu Investigasaun Kriminál (DIK), hahú investiga ona kazu sidadaun Indonézia ne’ebé tenta atu tuir votasaun iha Timor-Leste.

Kazu ne’e akontese iha Suku Darlete, Munisípiu Liquiça iha sidadaun Indonézia hosi Kefa,  insiál VAG (62) nudar eis-polísia Indonézia, seidauk hela kle’ur iha Timor-Leste, maibé hakarak ezerse nia direitu votu.

Tanba ne’e, iha momentu ne’ebá sidadaun refere atu ezerse nia votu iha eleisaun parlamentár domingu (21/5), maibé la konsege tanba autoridade seguransa liuhosi Komandu PNTL Munisípiu Liquiça, asegura kedan sidadaun hafoin simu informasaun hosi komunidade sira iha fatin refere.

Komandu PNTL Liquiça asegura kedan sidadaun ne’e no entrega kedan mai Derpartamentu Serbisu Investigasaun Kriminál (DIK), Komandu Jerál PNTL hodi mai tuir prosesu investigasaun.

“Agora nia iha ona polísia nian liman hodi hein prosesu tuir mai. Buat hotu ita seidauk bele fó sai tanba sei iha hela prosesu nia laran, karik viola krime eleitorál ou karik sidadaun ne’e hakarak ba ezerse duni nia direitu ba vota, entaun ida ne’e tenke la’o tuir lei”, Arnaldo Araújo hateten liuhosi konferénsia imprensa ne’ebé halao iha Komandu Jerál PNTL Caicoli, tersa ne’e.

Nia dehan, atu detein ka deporta sidadaun Indonézia refere ne’e depende ba prosesu identifikasaun mak sei justitifika atu sai oinsá.

“Ami seidauk bele koalia buat ruma, tanba kazu ne’e iha hela prosesu identifikasaun. Ha’u ohin koalia ona Komandate Munisípiu Liquiça, atu detein ka oinsá ne’e prosesu ne’e entrega tomak ona ba parte Departementu Investigasaun Kriminál mak hatene”. nia realsa.

Komandante ne’e afrma, hanesan portavós PNTL sei akompaña de’it kazu ne’e, tempu badak bele iha nia justisa.

Hatan kona-ba PNTL sei investiga parte ne’ebé fasilita kartaun eleitór ba sidadaun VAG, Arnaldo Araujo hateten, husu ba komunidade sira aprezenta keixa ba PNTL, kompleta ho evidénsia atu PNTL bele prosesu.

“Ami labele tún de’it ba bolu ema ne’e sem iha informasaun mai, ami sem iha keixa ruma mai, ami ne’e labele. Tanba ne’e, husu ba sidadaun sira tenke aprezenta keixa ne’e mai ami katak sidadaun ne’e tama ilegál duni, ami foti deklasaun, kuandu laiha evidénsia ami labele tún ba investiga ema ne’ebé deskonfia fasilita dokumentu ba sidadaun Indonézia”, nia dehan.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!