Top

PNTL rejista provizorioriamente kazu krime eleitorál 10

Portavós Komandu PNTL, Superintendente Xefe Polísia, Arnaldo Araújo. Imajen Tatoli/Francisco Sony

DILI, 23 maiu 2023 (TATOLI) – Portavoz Polísia Nasionál Timor-Leste (PNTL), Superintendente Xefe Arnaldo Araújo, informa durante eleisaun parlamentár, hosi kampaña eleitorál to’o iha loron eleisaun 21 maiu, PNTL rejista provizoriamente krime eleitorál 10.

“Munisípiu seluk ami seidauk simu informasaun maibé iha Munisípiu Bobonaro mak rejista kazu krime eleitorál hitu (7) no iha Munisípiu Díli rejista tolu”, Superintendente Xefe Arnaldo Araújo hateten liuhosi konferénsia imprensa ne’ebé halao iha Komandu Jerál PNTL Caicoli, tersa ne’e.

Nia esplika, krime eleitorál hitu ne’ebé akontese iha Bobaonaro mak balun lori tinta fakar ba fizkais, iha sidadaun balun vota dala rua, balun laiha kartaun eleitorál orijinál, maibé bé vota uza fali kartaun eleitorál kopia no STAE konsidera viola regra ne’ebé iha, la auotoriza eleitór sira atu ezerse sira nia votu iha sentru votasaun ne’ebé iha.

Iha Munisípiu Díli, PNTL rejista iha sentru votasaun balun iha krime eleitorál tolu mak hanesan sidadaun balun tama sentru votasaun ho telemovél hasai foto boleting votu bainhira vota hotu tiha, ho nune’e fiskais sira hetan infoma kedan ba PNTL hodi asegura kedan sidadaun iha sentru votasaun tanba tuir lei labele hasai foto iha sentru votasaun laran.

Krime eleitorál rua seluk eleitór balun uza baiklin hodi hamos tiha tinta hodi tenta vota dala rua nune’e PNTL asegura tiha kedan eletór refere no kazu krime eleitorál seluk mak sidadaun Indonézia hela iha Díli tuir kampaña.

“Ita la halao detensaun ba sira, tanba Komandu PNTL munisípiu rua ne’e só sira informa mai kona-ba ema sira ne’e maka viola krime eleitorál no momentu ne’e, PNTL halo de’it identifikasaun ba ema sira ne’e”, Komandante Arnaldo Araújo informa.

Nia dehan, Komandu PNTL munisípiu rua ne’e halo ona identifikasaun aktus sira ne’e, tanba só liuhosi indentifikasaun mak bele hatene katak ema sira ne’e viola krime eleitorál ka lae.

“Ha’u heteten buat hotuhotu liuhosi prosesu identifikasaun mak bele hatene. Tanba asaun ne’ebé mak sira halo ne’e, balun dalaruma laos krime eleitorál, tanba ne’e, buat hotu sei iha prosesu nian laran, depois ida ne’e, ita sei enkamiña ba Ministériu Públiku, sé karik iha duni krime eleitorál”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!