Pisikolojista klínika iha HNGV rekoñese rekursu umanu sei menus
DILI, 24 maiu 2023 (TATOLI) – Pisikolojista klínika iha Hospitál Nasionál Guido Valadres (HNGV), Idalina Borges rekoñese espesialista ba área psikatria sei menus iha Timor-Leste.
“Ita sei menus hela problema rekursu umanu kona-ba defisiénsia mentál ida ne’e tanba ne’e husu ba Governu kapasita no haruka tan médiku sira ba eskola kona-ba área ida ne’e tanba ita haree ita-nia moras barak sei lao abandona hela iha dalan”, Dalina Borges dehan iha Hotel Timor ,ohin.
Nia hateten, rekursu umanus ne’e presiza investe barak iha Timor-Leste hodi bele halo tratamentu ba ema ho moras mentál sira.
“It-nia rekursu ne’e tenke aumenta ba defisiénsia mentál ida ne’e tanba moras ne’e la’os destinu maibé liuhosi prosesu ida hanesan stress, la iha ema ruma mak fó hanoin entaun bele fó presaun ba nia an, bele mós dezenvolve ba moras ida bolu depresaun ida la ba trata lalais mak nia sai fali ba moras ida sikosis ka lakon konsiente, lakon desorientadu, lao iha dalan família abandona sira”, nia informa.
Tanba ne’e, família sira tenke tau atensaun ba ema defisiénsia mentál sira tanba família mak sai baze fundamentál ba prosesu rekuperasaun ba moras ne’e rasik.
“Família mak sai baze fundamentál ba prosesu rekuperasaun ba defisiénsia mentál tanba bainhira halo tratamentu nia-laran família mak tenke enkoraja sira atu bele rekupera lalais”, nia afirma.
Timoroan ne’ebé sai espesialista psikiatria hamutuk na’in-rua mak halo kna’ar iha HNGV.
Jornalista : Felicidade Ximenes
Editór : Zezito Silva
