TL3A realiza Workshop kona-ba saúde mentál ba estudante no joven
DILI, 24 maiu 2023 (TATOLI) – The Timor-Leste Australia Alumni Association (TL3A) halo Workshop kona-ba saúde mentál no habelar informasaun ba estudante no joven sira atu labele halo diskriminasaun ba ema ho defisiénsia mentál.
“Saúde mentál ida ne’e importante tebes iha ita-nia rain no hanesan fundamentu hodi bele tulun dezenvolvimentu nasaun nian, ita presiza kria sensibilizasaun métodu ida hodi povu sira komprende saida mak saúde mentál entaun ho workshop ida ne’e ita halo ba estudante sira no joven sira oinsá atu habelar informasaun ba komunidade sira labele halo diskriminasaun ba ema ho defisiénsia mentál sira ne’e”, Antigu Alumni TL3A Alberto Alves Piedade, dehan ba jornalista sira iha Hotel Timor, ohin.
Nia dehan, defisiénsia mentál ne’e mosu tanba esperiénsia krize moris nian, dalabarak ema hetan agresaun fízika, abusu seksuál, violénsia doméstika, depresaun ka estres.
“Defisiénsia mentál ne’e akontese ba ema ho idade adultu, esperiénsia krize moris nian hanesan harii família sedu, isin rua sedu, buka servisu lahetan, presaun maka’as husi família, ikus mak mosu depresaun agregasaun fízika sira”, nia esplika.
Asosiasaun Alumni Australia servisu hamutuk liuhosi setór saúde públika atu bele sensibiliza informasaun ida ne’e ba estudante sira atu hatutan ba komunidade kona-ba saúde mentál ba inan aman sira. Tanba inan aman balun mós hatudu ona moras mentál hanesan sikosis lao iha estrada, koalia mesak ida ne’e presiza halo tratamentu espesífiku ba sira.
Iha fatin hanesan, Pisikolojista klíniku iha Hospitál Nasionál Guido Valadres (HNGV), Idalina Borges agradese ba Asosiasaun Alumni Australia tanba habelar informasaun kona-ba importasaun defisiénsia mentál ba komunidade sira oinsá halo diferensia ba defisiénsia mentál sira ne’e.
“Atividade ohin nian predomina tebes ho joven sira, espera NGO nafatin lolo liman ba malu atu lori saúde mentál ba oin”, Idalina Borges informa.
Iha whorkshop ne’e partisipa husi estudante sira iha Dili inklui mós husi joven sira.
Jornalista : Felicidade Ximenes
Editór : Zezito Silva
