iklan

JUSTISA, HEADLINE

Tribunál aplika prizaun preventiva ba sidadaun Indonézia tenta vota iha Liquiça

Tribunál aplika prizaun preventiva ba sidadaun Indonézia tenta vota iha Liquiça

Edifísiu Tribunal Rekursu. Imajen Tatoli/Francisco Sony

DILI, 24 maiu 2023 (TATOLI)- Tribunál Judisiál Primeiru Instánsia Díli, aplika medida koasaun prizaun preventiva ba arguidu sidadaun Indonézia ho insiál VGA, ne’ebé mak atu tuir votasaun iha elesaun parlamentár iha Suku Darulete, Postu Administrativu Liquiça Vila, Munisípiu Liquiça, tanba iha indísiu forte arguidu komete duni krime ne’ebé Ministériu Públiku imputa ba nia.

Iha posesu interogatoriu dahuluk, Ministeriu Públiku imputa krime tolu ba arguidu mak krime fraude iha votasaun 237 no falsifikazaun agravada ne’ebé previstu iha artigu 304, inklui krime burla hosi Kódigu Penál Timor-Leste.

“Iha despaixu ikus hosi Tribunál Judisiál Primeiru Instánsia, aplika prizaun preventivu ba ha’u nia klienta, tanba konsidera ha’u nia kliente iha períodu fuga katak ha’u nia kliente bele halai ses hosi prosesu, tanba ne’e mak Tribunál deside lihosi despaixu ikus hodi aplika medida koasaun prizaun preventiva ba arguidu, hodi bele asegura ha’u nia kliente hodi hein prosesu tuir mai”, Defeza Arguidu AVG, Advogadu Privadu Marino da Cruz ba jornalista sira hafoin remata Primeiru Interogatóriu Preventiva ba arguidu sidadaun Indonézia ho insiál VGA, kuarta ne’e.

Nia afirma, hanesan Defeza hosi arguidu nian la simu hosi Tribunál nian no ba oin sei haree hodi halo rekursu hasoru desizaun Tribunál.

“Despaixu hosi Tribunál ha’u seidauk simu maibé kuandu ha’u simu ona mak ita haree ba oin atu halo rekursu ka la’e tanba atu halo rekursu ne’e ita iha prasu loron 15 nia-laran”, Marino da Cruz dehan.

Antes ne’e, iha prosesu interogatóriu dahuluk Tribuál Judisiál Primeiru Instánsia Díli, Ministériu Públiku promove krime fraude iha votasaun 237 no falsifikazaun agravada ne’ebé previstu 304  hosi Kódigu Penál inklui krime burla.

Iha alegasaun MP husu Tribunál atu aplika medida koasaun ba iha arguidu mak aplika pena prizaun.

Parte Defeza arguidu Advogadu Privadu Marino da Cruz husu ba Tribunál Judisiál Primeiru Instánsia atu aplika medida koasaun apresentasaun períodika ba nia klineta VAG tanba nia klienta laos sidadaun Indonézia, maibé nia nudar ema timoroan tanba inan aman ne’e Timor orijinál.

Defeza ne’e haktuir, arguidu uluk nudar membru Polísia Indonézia no altura mosu krize 1999, arguidu AVG halai ba Kefa razaun tanba nia ferik oan isin rua todan, nia labele hela hamutuk ho família ba iha foho leten, entaun momentu ne’eba arguidu sira deside halai ba iha Kefa no hela tiha iha ne’ebá.

Maibé arguidu mai bebeik ona iha Timor desde iha tinan 2005 hodi mai vizita família, iha tinan hirak liu ba, nia mai hosi Kefa to’o iha Darulete, hodi trata nia dokumentu atu sai sidadaun Timor-Leste, Xefe Suku husu haruka nia halo karta muda fatin nian hosi Kefa muda mai iha Timor-Leste, entaun dokumentu sira ne’e nia kumpre hotu ona no agruidu deklara ba Tribunál katak iha tinan kotuk eleisaun prezidensiál 2022 nia ezerse direitu ba vota.

Iha 1 maiu 2023 arguidu reforma ona hosi polísia Indonézia nia trata dokumentu sira hodi hela permanente ho família iha Liquiça nune’e iha eleisaun foin dadaun ne’e, arguidu haree ema ba vota entaun nia mós hakarak ba tuir votasaun.

Tanba ne’e, iha alegasaun hanesan Defeza, arguidu nia Advogadu Privadu Marino da Cruz husu ba Tribunál Judisiál Primeira Instánsi atu aplika medida aprezenta períodika ba nia kliente, tanba arguidu la halai sai hosi justisa tanba tribunál mós hasai despaixu proibisaun aujensia ba arguidu hodi sita arguidu nia dokumentu hanesan pasaporte.

Tanba ne’e, Defeza husu Tribunál aplika medida koasaun aprezentasaun períodika nune’e hein prosesu normál no prosesu investigasaun ne’ebé mak la’o iha Ministériu Públiku.

Prosesu Interogatóriu dahuluk ne’e prezide hosi Juiz Álvaro Maria Freitas, Ministériu Públiku reprezenta hosi Prokuradór João Marquês, arguidu hetan asisténsia legál hosi Advogadu Privadu Marino da Cruz

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!