Governu foun tenke tau importánsia dezenvolve desportu
DILI, 25 maiu 2023 (TATOLI) – Sekretáriu Jerál Federasaun Karate-do Timor-Leste (FKTL) Antonio Carlos de Araujo, husu ba Governu da-sia tenke tau importánsia hodi dezenvolve modalidade desportu hotu iha nasaun ida-ne’e.
“Ami husu ba Governu foun ida ne’e, tenke tau prioridade ba modalidade desportu sira, liuliu se mak ba tur iha Sekretáriu Estadu Juventude no Desportu (SEJD) tenke tau ema ne’ebé iha koñesimentu ba desportu no ema ne’ebé iha jestaun di’ak atu jere modaliade sira hotu ho di’ak”, Sekretáriu Jerál dehan ba Agência TATOLI iha Jinaziu Dili, ohin.
Nia dehan, desportu hanesan meiu ida hadia ema nia saúde no lori mós nasaun nia naran ba kompete iha mundu.
“Dalabarak Governu ladún tau importánsia ba desportu, maibé liuhosi desportu mak ita-nia atleta sira ba kompete iha mundu internasionál bainhira manán hamorin ona ita-nia nasaun nia naran”, nia dehan.
Nia husu mós ba Governu foun atu fó seguransa sosiál ba atleta no treinadór sira kada modaliade.
Aleinde ne’e, Governu tenke trata modalidade hotu hanesan labele fó liu importánsia ba modaliade ida ka rua no husik modaliade seluk iha kotuk.
Jornalista: Hortencio Sanchez
Editór : Zezito Silva
