VIQUEQUE, 25 maiu 2023 (TATOLI)-–Adjunto Sekretáriu Administradór munisípiu Viqueque, Teo Tonio da Silva Sarmento, informa, Governu komunika ona ho empreza hodi rezolve sedimentasaun iha ponte Welolo, postu administrativu Viqueque Vila, munisípiu Viqueque.
“Foin lalais ne’e Governu liuhosi Ministériu Obra Públika (MOP) halo ona kontratu ho empreza xineza Fuan Kinjian, ne’ebé destaka ekipamentu pezadu hodi halo normalizasaun ba dalan Welolo ho emerjénsia, maibé bee kontinua boot hodi nalihun nafatin iha dalan sira-ne’e,” Tonio da Silva, hateten ba Agência Tatoli, iha postu Viqueque Vila, kinta ne’e.
Hafoin rezolve emerjénsia, Governu sei kontrata empreza hodi rezolve sedimentasaun hosi tasi ba foho.
“Ha’u mós koordena ho Autoridade lokál sira hodi ko’alia ba ninia abitante sira hodi halo loos kultura iha foho hun, nune’e ita bele normaliza bee, se la’e ita fakar osan barak mós sei kontinua mosu sedimentasaun iha ponte Welolo,” nia akresenta.
Notísia relevante : MOP presiza normaliza no hasai sedimentasaun iha ponte Welolo Viqueque
Nia dehan, kondisaun ne’e difikulta movimentu abitante sira tanba bee nalihun to’o abitante sira-nia uma.
“Ha’u sei esforsu-an hodi buka solusaun ba sedimentasaun Welolo. Munisípiu akompaña hodi halo monitorizasaun ba sedimentasaun no resposável ministériu mak sei tau orsamentu hodi rezolve. Daudaun ema la’o ain sira bele liu di’ak no transporte sira asesu di’ak, maski bee moris iha dalan kontinua tun tuir dalan, maibé asesu di’ak,” nia hato’o.
Iha fatin ketak, Diretór Servisu Obraa Públika munisípiu Viqueque, Mário do Rego, hateten, Governu tau ona planu hodi rezolve mota Welolo to’o tasi maibé tanba Governu sei troka, maka tenke hein desizaun hosi nasionál.
“Ami ne’e akompaña de’it, espera Governu agora sei iha tempu hodi rezolve mota Welolo atu nune’e labele fó impaktu ba populasaun sira-nia movimentu. Iha uma-kain 31 mak daudaun hela iha área Welolo,” nia tenik.
Jornalista : Vitorino Lopes da Costa
Editora : Julia Chatarina
