DILI, 25 maiu 2023 (TATOLI) – Komandu Polísia Nasionál Timor-Leste (PNTL) hamutuk família vítima hodi fó ómenajen ba membru polísia ne’ebé sai vítima iha krize 25 maiu 2006.
Serimónia omenajen ne’e Komandu PNTL hamutuk ho família vítima hahú ho missa agradesimentu no taka ho serimónia kari ai-funan iha monumentu PNTL ne’ebé lokaliza iha Caicoli, ne’ebé prezide direta hosi Komandante PNTL, Komisáriu Jerál Polísia Henrique da Costa no segundu Komandante PNTL Komisáriu Polísia Pedro Belo, partisipa iha serimónia ne’e mak ofisiál no superiór PNTL hotu inklui membru PNTL.
Hafoin serimónia kari ai-funan, Komandante Komandu Pesoál no Formasaun, Superintendente Xefe Polísia, Arquimino Ramos, hateten membru PNTL hotuhotu konsentra iha monumentu PNTL, atu presta omenajen ba membru PNTL nain 12 ne’ebé sai vítima iha 25 maiu 2006.
“Serimónia ida ohin ne’e koñesidu hanesan 25 maiu 2006 ne’ebé ita bo’ot sira haree, ami-nia kolega nain 12 mak mate iha ne’e, barak agora sei moris, sira balun sofre hela kanek ida, mak agora iha Austrália ho besi de’it to’o agora sei ho kadera roda, ita konvida sira nian família, mai partisipa missa no mós tau ai-funan, hanesan aktu agradesimentu”, Superintendente Xefe Polísia, Arquimino Ramos hateten ba jormalista sira iha monumentu PNTL Caicoli, kinta ne’e.
Nia dehan, loron 25 maiu ne’e nudar loron importante ba PNTL ne’ebé hanaran memoriál PNTL (PNTL day), la’os de’it nudar loron ómenajen ba membru PNTL nain 12 ne’ebé sai vítima ba krize 2006 maibé loron ida ne’e mós bele dedika ba membru PNTL sira ne’ebé mak halo servisu patrolamentu mak mate no balun ne’ebé halo servisu hela to’o hetan asidente.
Hanesan kazu 2012 iha membru PNTL lubuk oan ida bainhira transporta materiál sensetivu no la sensentivu lori hosi Bobonaro mai Díli mak hetan dezastre, Koamandu PNTL mós hili loron ida ne’e hanesan loron espesiál ba sira hodi fó onra no dignifika sira sira nian dedikasaun.
“Ne’ebé loron ida ohin ne’e ita konsidera hanesan loron importante ba PNTL ne’ebé halao hela funsaun maka mate hanesan iha 25 maiu 2006 ne’e polísia barak mak mate inklui balun kanek no balun ne’ebé sira dedika sira nia aan, baihira sira halo serbisu mak sira mate”, Komandante Arquimino haktuir.
Komandante Komandu Pessoál no Formasaun, Komandu PNTL to’o agora la taka matan ba membru PNTL ne’ebé sai ona vítima iha 25 maiu 2006 no hirak ne’ebé ho kondisaun moris defisiénsia fízika.
‘’Agora daudaun, komandu pesoál formasaun rekolla hela dadus. Ita haruka ona karta ba Koamdante Jerál PNTL no autoriza ona no ita mós haruka ona karta ba komandu munisipu, inklui komandu unudade sira atu rekolla membru ne’ebé sai vítima iha 25 maiu 2006. Inklui sira ne’ebé mak halo kna’ar hela mak hetan dezastre, balun mate balun tohar, ita rekomenda ba komandante jerál hodi ita bele fó sertifikadu louvor”, nia konklui.
Jornalista: Natalino Costa
Editór : Zezito Silva
