Top

Tinan 20 UPM sei iha difikuldade ba fasilidade  

Unidade Polísia Maritima (UPM) fó treinamentu nani ba membru Bomboeiros sira. Iha tasi laran Lesudere Dili, sesta (11/02). Imajen Tatoli/Francisco Sony

DILI, 25 maiu 2023 (TATOLI) – Komandante Unidade Polísia Marítima (UPM) Superintendente Polísia Eugénio Pereira, hateten UPM durante tinan XX sei iha difikuldade barak hanesan fasilidade no seluk tán.

UPM hanesan komponente ida iha instituisaun PNTL, nia misaun atu responde liubá área marítima ne’ebé define ona iha Konstituisaun RDTL.

“Difikuldade mak rekursu umanu ho fasilidade menus, ida ne’e la hamate ita-nia servisu, maibé ita iha opsaun ne’ebé iha, buka atu bele responde ba situasaun sira ne’e atu garante nafatin misaun iha tasi Timor-Leste. Ami enfrenta duni difikuldade kona-ba iha transporte marítima, ida ne’e hanesan difikuldade ho obstákulu ba ami, maibé ami nafatin firmeza atu responde ba misaun ida ne’e ho ami-nia, rekursu humanu, tanba ita haree iha area kosteira ne’e la’os iha Díli de’it, maibé ne’e kuaze haleu iha ita-nia illa Timor tantu iha Ataúro”, Komandante Unidade Polísia Marítima (UPM)  Superintendente Polísia Eugénio Pereira  iha nia kna’ar fatin UPM Seonál, kinta ne’e.

UPM orienta atu ezerse nia responsabilidnade haree ba área tasi nian liuliu atu halo prevensaun ba iha aktu krime organizadu sira ne’ebé akontese iha área tasi Timor-Leste nian.

Eugénio subliña, kona-ba fasilidade transporte marítima, ró atu halo salvamentu ema nia vida ne’e importante maibé menus tebes iha UPM, tanba ne’e difisil atu asegura seguransa iha tasi ho seguru no ba rekursu umanu iha UPM mós sai hanesan difikuldade.

“Tanba ita iha  postu vizilansia a  12 iha iha ne’e mesak iha  área kosteira sira ne’e, ita  menus rekursu umanu atu difisil atu halo prevensaun iha area kosteira, tanba ne’e presiza efetivu membru tenki barak, hodi  halo ezekusaun servisu ba mediasaun bele seguru liu tán iha área marítima nian,” Nia dehan.

Tuir nia, ezisténsia UPM ne’ebé kompleta ona tinan 20, halo servisu iha tasi, maibé difikuldade mós ba ekipamentu salvamentu nian hanesan jaket no seluk tán hodi polísia utiliza halo servisu.

Tanba ne’e, hanesan Komandante UPM sempre hato’o ba Komandu Jerál PNTL, maibé sira labele halo buat ida, bainhira Orsamentu Jerál Estadu (OJE) ne’ebé kada tinan aloka labele responde ba nesesidade hotu iha instituisaun PNTL nian.

“Ami aprezenta anualmente iha ami-nia Orsamentu Jerál Estadu (OJE), kona-ba Unidade Polísia Marítima, klaru katak Komandu Jerál PNTL haree ba nesesidade sira ne’e maibé labele halo milagre dala ida, maibé ami utiliza meius ne’ebé iha hodi halo servisu iha tasi’’, Eugénio dehan.

Maske nune’e, UPM halo kooperasaun ho parseiru dezenvolvimentu sira, hanesan TLPDP, JICA no mós Embaixada Estadu Unidos Amerika hodi kontinua apoiu ekipamentu balun ba UPM hodi utiliza ba servisu.

Tuir dadus, efetivu UPM agora daudaun hamutuk 180, nain ida mak tama ona iha lista atu reforma hodi ba fali vida sivíl.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!