DILI, 25 maiu 2023 (TATOLI) – Tribunál Judisiál Primeiru Instánsia Díli liuhosi despaixu ikus absolve arguidu na’in-rua ho isiál JGA ho GFSP hosi krime violasaun segredu eskrutiñu ka krime hasai fotografia ba buletin votu bainhira ezerse direitu ba vota iha sentru votasaun iha eleisaun parlamentár, domingu (21/5) foin lalais ne’e.
Arguidu na’in-rua ne’e komete krime ne’e iha fatin ne’ebé diferente, arguidu JGA hasai fotografia ba buletin votu bainhira ezerse sira-nia direitu votu iha sentru votasaun iha Suku Fomentu enkuantu arguidu GFSP komete krime hanesan iha sentru votasaun iha área Comoro, bainhira arguidu ezerse nian direitu iha sentru votasaun ida iha Comoro.
Ho hahalok arguidu nian, fiskais iha sentru votasaun deskobre no hato’o ba autoriedade seguransa sira iha sentru votasaun no asegura kedan arguidu na’in-rua refere-
Arguidu sira submete kedan ba prosesu sumáriu iha Tribunál Judisiál Primeira Instánsia Díli, Ministeriu Públiku imputa krime violasaun segredu eskrutiño ka krime hasai fotografia ba buletin votu bainhira ezerse sira-nia direitu ba vota iha sentru votasaun.
Hafoin Tribunál Judisiál Primeiru Instánsia Díli liuhosi Juiz Titulár Argentino Nunes, rona tiha parte hotu, Juiz prosesa no hatún despaixu ikus hodi absolve arguidu na’in-rua JGA ho GFSP krime violasaun segredu eskrutiño tanba arguidu sira laiha indísiu ba krime.
“Tribunál hasai despiaxu ikus hodi absolve arguidu na’in-rua hosi krime ne’ebé Ministériu Públiku imputa ba ha’u nia kliente na’in-rua. Tanba Tribunál haree katak aktus ne’ebé arguidu rua halo ne’e laiha indísius krime ruma”, Defeza arguidu na’in-rua, Advogadu privadu Francisco Caetano Martins ba jornalista sira iha Tribunál Judisial Primeiru Instánsia Dili, Colmera, sesta ne’e.
Iha prosesu sumáriu ne’e, prezide hosi Juiz Argentino Nunes, Ministériu Públiku reprezenta husi Prokuradór António Tavares no arguidu hetan asiténsia legál hosi Advogadu privadu Francisco Caetano Martins.
Jornalista: Natalino Costa
Editór : Zezito Silva
