Veteranu 534 iha Viqueque hetan tratamentu saúde espesiál
DILI, 25 maiu 2023 (TATOLI) – Xefe Departamentu Apoia no Koordenasaun Servisu Espesializadu iha Ministériu Saúde, Nilton da Cruz, hateten iha fulan ne’e, Ministériu Saúde (MS) hamutuk ho Ministériu Asuntu Kombatente Libertasaun Nasionál fó ona tratamentu espesializadu ba veteranu sira iha Munisípiu Viqueque hamutuk 534.
‘’Iha loron 15 fulan maiu ita hamutuk ho Ministériu Asuntu Kombatente Libertasaun Nasionál halo ona tratamentu espesializadu ba ita-nia veteran sira iha Munisípiu Viqueque hamutuk 534”, Nilton da Cruz informa iha nia kna’ar fatin Caicoli, ohin.
Nia dehan, iha konsulta ne’e, médiku sira konsegue konsulta ba veteran no deteta moras sira maioria mak pulmaun, moras matan no mós moras fuan.
“Ita-nia veteranu sira ne’e bainhira ita halo konsulta, ita deteta sira nia moras hanesan moras pulmaun, fuan no matan tanba ita haree sira idade ona matan mós komesa malaok ba daudaun”, nia esplika.
Nia afirma, kazu sira ne’ebé mak labele halo intervensaun iha Viqueque, espesialista sira halo koordenasaun ho ospitál referál mai nasionál hodi halo tratamentu kontinu.
“Moras ne’ebé barak, ita halo referál mai Hospitál Nasionál Guido Valadares (HNGV), maioria matan no moras fuan”, nia subliña.
Nia rekorda, médiku sira ne’ebé halo tratamentu espesializadu ba veteranu sira ne’e mai husi espesialista interna, Ortopedista, cardiolojia, dermatolojia, surjia jerál, no espesialista ba ibun tilun no kakorok.
Atividade konsulta espesializada ne’e ho objetivu atu dignifika no fó tratamentu ne’ebé mak dignu ba veteranu sira ne’ebé mak iha baze, labele asesu ba fasilidade saúde sira.
Jornalista : Felicidade Ximenes
Editór : Zezito Silva
